აშშ-ის ყოფილმა პრეზიდენტმა, ბილ კლინტონმა განაცხადა, რომ ეპშტეინის საქმის მასალებში არსებული პიკანტური ფოტოები – მათ შორის ისიც, სადაც ის ჯაკუზიშია – არ ცვლის იმ ფაქტს, რომ მას „არაფერი დაუშავებია“. ინფორმაციას ამის შესახებ ამერიკული გამოცემა The New York Post-ი ავრცელებს.
კლინტონმა განაცხადა, რომ ჯეფრი ეპშტეინის საქმეზე წარმომადგენელთა პალატის ზედამხედველობის კომიტეტს ჩვენებას იმიტომ აძლევს, რომ „უყვარს თავისი ქვეყანა“, ხოლო მსხვერპლნი „იმსახურებენ არა მხოლოდ სამართლიანობას, არამედ განკურნებას“.
ყოფილმა პრეზიდენტმა სოციალურ ქსელში თავისი ორგვერდიანი შესავალი სიტყვა გამოაქვეყნა და დაწერა: „როგორც ადამიანი, რომელიც ოჯახური ძალადობის გარემოში გაიზარდა, მცირე ეჭვიც კი რომ მქონოდა იმის შესახებ, თუ რას აკეთებდა ის – არა მხოლოდ არ ავიდოდი მის თვითმფრინავში, არამედ პირადად ჩავაბარებდი მას სამართალდამცველებს და თავად ჩავუდგებოდი სათავეში მოთხოვნას მისი დანაშაულების სამართლიანად დასჯის შესახებ და არა ლმობიერი გარიგებების დადებისკენ“.
მან აღნიშნა, რომ მისი „ნაცნობობა“ ეპშტეინთან იყო „ხანმოკლე“ და „დასრულდა წლებით ადრე, სანამ მისი დანაშაულები გამჟღავნდებოდა“.
მან ასევე დასძინა, რომ არასოდეს ყოფილა რაიმე დანაშაულის „თვითმხილველი“.
„მე არაფერი მინახავს და არაფერი დამიშავებია“, – ნათქვამია მის განცხადებაში. – „წარსულის გადმოსახედიდანაც კი, მე არ მინახავს არაფერი ისეთი, რაც დამაეჭვებდა“.
კლინტონმა გააფრთხილა „რესპუბლიკელები“, რომ შესაძლოა არაერთხელ იტყვის „არ მახსოვს“, და აღნიშნა, რომ ეს მოვლენები დიდი ხნის წინ მოხდა.