საფრანგეთი და იტალია საკუთარ მოქალაქეებს მოუწოდებენ, თავი შეიკავონ ისრაელსა და ირანში მოგზაურობისგან.
საფრანგეთის მთავრობამ მოუწოდა თავის მოქალაქეებს, არ იმოგზაურონ ისრაელში, იერუსალიმსა და დასავლეთ ნაპირზე, თუნდაც ტურისტული ან ოჯახური ვიზიტების მიზნით. საფრანგეთმა ასევე ურჩია რეგიონში მყოფ თავის მოქალაქეებს, თავი აარიდონ დემონსტრაციებსა და მიტინგებს და წინასწარ შეიგულონ თავშესაფრები.
პარალელურად, იტალიის საგარეო საქმეთა სამინისტრომ მოუწოდა თავის მოქალაქეებს, დატოვონ ირანი და ურჩია, უკიდურესი სიფრთხილე გამოიჩინონ ახლო აღმოსავლეთში, უსაფრთხოების მუდმივად არასტაბილური მდგომარეობის გამო.
„იტალიელებს, რომლებიც (ირანში) ტურიზმის მიზნით იმყოფებიან ან რომელთა ყოფნა მკაცრად აუცილებელი არ არის, მოვუწოდებთ, დატოვონ ქვეყანა“, – ნათქვამია სამინისტროს განცხადებაში.
იტალიის საგარეო უწყების განცხადებაში ასევე აღნიშნულია, რომ ერაყსა და ლიბანში მოგზაურობაც მკაცრად არ არის რეკომენდებული. იტალიის საგარეო უწყება ისრაელში მყოფ იტალიელ მოქალაქეებს ურჩევს, მაქსიმალური სიფრთხილე და სიფხიზლე შეინარჩუნონ.