ევროკავშირი ირანში მიმდინარე ომის გამო ლტოლვილების ახალი ტალღისთვის ემზადება. ინფორმაციას Politico ოთხი ქვეყნის მიგრაციის საკითხებზე მომუშავე მინისტრზე დაყრდნობით ავრცელებს.
გამოცემის ცნობით, ბრიუსელში ფიქრობენ, რომ ომს გამოქცეული ირანელები ევროკავშირს მიადგებიან. ისინი იმედოვნებენ, რომ მიგრაციის წესები, რომლებსაც ევროკავშირი 10 წლის განმავლობაში ამუშავებდა, ახალ გამოწვევას გაუმკლავდება.
როგორც გამოცემა იუწყება, 2015 წელს ევროპას თავშესაფრის თხოვნით ნახევარ მილიონზე მეტმა ადამიანმა მიმართა. მაშინ ადამიანები სირიაში სამოქალაქო ომს გაურბოდნენ. 2015 წლის მიგრაციული კრიზისი ევროკავშირის წევრ სახელმწიფოებს შორის განხეთქილების მიზეზი გახდა. ამის გამო ბრიუსელმა საიმიგრაციო პოლიტიკის რეფორმა ჩაატარა.
ახალი საიმიგრაციო პოლიტიკის ძალაში შესვლამდე რამდენიმე კვირაა დარჩენილი, თუმცა ახლო აღმოსავლეთში საბრძოლო მოქმედებების დაწყება მისი ეფექტიანობის შესამოწმებლად გამოდგება, წერს გამოცემა.
„ევროკავშირს არ შეუძლია ლტოლვილებთან დაკავშირებული ახალი კრიზისის იგნორირება“, – განუცხადა გამოცემას კვიპროსის მიგრაციის მინისტრის მოადგილემ, ნიკოლას იოანიდესმა.
მსგავს კრიზისს „შეუძლია შეამოწმოს ბლოკის ახალი წესების ეფექტიანობა და ჩვენ ამისთვის მზად უნდა ვიყოთ“, – დასძინა მან.