აშშ-ის მთავრობა 10 მილიონ დოლარამდე ჯილდოს აწესებს ინფორმაციისთვის ირანის ლიდერების შესახებ, მათ შორის ქვეყნის ახალი უზენაესი ლიდერის, მოჯთაბა ხამენეის თაობაზე. ინფორმაციას ამის შესახებ CNN-ი ავრცელებს.
სახელმწიფო დეპარტამენტის პროგრამა Rewards for Justice-ის (ჯილდო მართლმსაჯულებისთვის) მიერ დაწესებული ჯილდო აშშ-ისა და ისრაელის მიერ ირანის წინააღმდეგ მიმდინარე სამხედრო კამპანიის ფონზე გამოცხადდა, მას შემდეგ, რაც აიათოლა ალი ხამენეი და ირანის სხვა მაღალჩინოსნები მოკლეს.
განცხადებაში ნათქვამია, რომ ინფორმაცია სპეციალურად შემდეგ პირებზე გროვდება: ხამენეი, მისი შტაბის უფროსის მოადგილე ალი ასღარ ჰეჯაზი, მისი სამხედრო მრჩეველი, გენერალ-მაიორი იაჰია რაჰიმ საფავი, მისი მრჩეველი ალი ლარიჯანი, შინაგან საქმეთა მინისტრი, ბრიგადის გენერალი ესკანდარ მომენი და დაზვერვისა და უსაფრთხოების მინისტრი ესმაილ ხატიბი.