ოთხი ადამიანი დაიღუპა და 15 დაშავდა რუსეთის მიერ კიევის ოლქზე განხორციელებული მასშტაბური სარაკეტო და დრონების შეტევის შედეგად. ინფორმაციას ამის შესახებ უკრაინული მედია ავრცელებს.
რეგიონის სამხედრო ადმინისტრაციის ხელმძღვანელის თქმით, შეტევა ოთხ რაიონს შეეხო. ყველაზე დიდი დაზიანება დაფიქსირდა ობუხოვისა და ბროვარის რაიონებში.
სულ დაზიანდა 30-ზე მეტი ობიექტი: მრავალსართულიანი და კერძო საცხოვრებელი სახლები, სასწავლო დაწესებულებები, კრიტიკული ინფრასტრუქტურის ობიექტები, საწარმოო და საწყობის შენობები, ასევე ავტომობილები.
უკრაინული მედიის ცნობით, რუსეთის თავდასხმის სამიზნე იყო ენერგეტიკული ინფრასტრუქტურა.
რუსეთის იერიშების გამო კიევსა და კიევის ოლქის ბუჩის რაიონში ელექტროენერგია გაითიშა. უკრაინის საგანგებო სიტუაციების სახელმწიფო სამსახურმა თავდასხმის შედეგების ამსახველი ფოტოები გაავრცელა.