საქართველოს თავდაცვის სამინისტროსა და კოლეჯ „სქილვილს“ შორის ურთიერთთანამშრომლობის მემორანდუმი გაფორმდა. დოკუმენტს ხელი თავდაცვის მინისტრის პირველმა მოადგილემ, პაატა პატიაშვილმა და ორგანიზაციის აღმასრულებელმა დირექტორმა, გიორგი მარიამიძემ მოაწერეს. ინფორმაციას თავდაცვის სამინისტროს პრესსამსახური ავრცელებს.
კოლეჯში პროფესიული მომზადებისა და გადამზადების მოკლევადიანი კურსების გავლისას, თავდაცვის სამინისტროს წარმომადგენლები მნიშვნელოვანი შეღავათებით ისარგებლებენ. თანამშრომლობის ფარგლებში, გათვალისწინებულია ერთობლივი აქტივობებისა და პროექტების განხორციელება. კოლეჯის ძირითადი მიმართულებაა ინფორმაციული და საკომუნიკაციო ტექნოლოგიების (ICT) სფერო, რაც თანამედროვე შრომის ბაზრის მნიშვნელოვან მოთხოვნებს პასუხობს.
საქართველოს თავდაცვის სამინისტრო ჯარისკაცებზე ზრუნვისა და დაფასების პროცესში, სხვადასხვა, მათ შორის, განათლების სექტორთან აქტიურად თანამშრომლობს. ამ მიზნით, სამინისტროს სოციალურ საკითხთა და ფსიქოლოგიური მხარდაჭერის დეპარტამენტი კომპანიებთან, სამთავრობო და არასამთავრობო ორგანიზაციებთან მოლაპარაკებებს აწარმოებს.