თეთრი სახლის მთავარი ექსპერტი ევროპის საკითხებში უახლოეს დღეებში, სავარაუდოდ, თანამდებობას დატოვებს. ზოგიერთი წყაროს ცნობით, ეს ცვლილება იმ საკადრო გადაადგილების ნაწილია, რომელიც სახელმწიფო მდივან მარკო რუბიოს ეროვნული უშიშროების საბჭოში პოლიტიკის ფორმირების პროცესზე უფრო მეტი გავლენის მოხდენის საშუალებას მისცემს. ცვლილებების შესახებ ინფორმირებული ოთხი პირის თქმით, რომლებმაც ანონიმურად დარჩენა ისურვეს, თანამდებობას ევროპისა და რუსეთის საკითხების მიმართულების ხელმძღვანელი, ჩარლზ მაკლოკლინი დატოვებს.
ევროპელმა ოფიციალურმა პირებმა „როიტერს“ განუცხადეს, რომ მათ, პიროვნულ დონეზე, მაკლოკლინი, მთლიანობაში, მოსწონდათ და მას „პატიოსან“ და „პროფესიონალ“ სპეციალისტად მიიჩნევდნენ. თუმცა, ბევრი ასევე ამბობს, რომ იგი უფრო რუსეთთან ურთიერთობების ნორმალიზებით იყო დაინტერესებული, ვიდრე მოსკოვზე დამატებითი ზეწოლის განხორციელებით. რა გავლენას იქონიებს საგარეო პოლიტიკაზე მაკლოკლინის წასვლა, საბოლოო ჯამში, იმაზე იქნება დამოკიდებული, თუ ვინ შეცვლის მას. „როიტერის“ ზოგიერთი წყარო იმედოვნებს, რომ მისი ადგილმონაცვლე რუსეთის მიმართ უფრო მკაცრ პოზიციას დაიკავებს.
კომენტარის გაკეთების თხოვნაზე მაკლოკლინს „როიტერისთვის“ არ უპასუხია. ბოლო დროს, ვაშინგტონის ევროპელი მოკავშირეები სულ უფრო მეტად გამოხატავენ შეშფოთებას იმის გამო, თუ რა მიმართულებით ვითარდება აშშ-ის პოლიტიკა დონალდ ტრამპის ადმინისტრაციის პირობებში. ტრამპმა მკაცრად გააკრიტიკა ნატო-ს ევროპელი პარტნიორები იმის გამო, რომ ირანის წინააღმდეგ ომში ისინი შეერთებულ შტატებს არ ეხმარებიან.
https://bntnews.bg/news/glavniyat-ekspert-po-evropeiskite-vaprosi-v-beliya-dom-napuska-posta-si-1396866news.html