პარტია „ხალხის ძალის“ წევრმა, დეპუტატმა ზურაბ ქადაგიძემ საქართველოს პარლამენტის საშემოდგომო სესიის პლენარულ სხდომაზე, 2027 წლის ბიუჯეტის განხილვისას, ფინანსთა მინისტრს, ლაშა ხუციშვილს, რეგიონებში ამორტიზებული საავტომობილო გზების რეაბილიტაციისთვის გამოყოფილი თანხების შესახებ კითხვით მიმართა.
დეპუტატმა აღნიშნა, რომ როდესაც ქვეყანას შუა დერეფნის ფუნქცია აქვს და საერთაშორისო ტვირთების გატარება სურს, გზების ასეთი სავალალო მდგომარეობა მიუღებელია და პრესტიჟის საკითხიცაა.
„გუშინაც გავაკეთე განცხადება ამ საკითხთან დაკავშირებით. რეგიონში გზების კუთხით სამწუხარო რეალობა გვაქვს.
მინდა აღვნიშნო, რომ აქ არ არის საუბარი სოფლების შიდა გზებზე.
საუბარია ახალქალაქი-კარწახისა და ნინოწმინდიდან სომხეთის საზღვრამდე მიმავალ საერთაშორისო მნიშვნელობის საავტომობილო გზებზე.
ოთხი წელია, ეს გზები განადგურებულია. მოსახლეობა პერმანენტულად აპროტესტებს ამას და გზის გადაკეტვის მცდელობაც ჰქონდათ. პროტესტს გადამზიდავი კომპანიების წარმომადგენლებიც შეუერთდნენ.
ამორტიზებული გზა მხოლოდ ჩვენი შიდა პრობლემა არ არის. როდესაც დაკავშირებადობაზე და შუა დერეფანზე ვსაუბრობთ, ამ დროს სასაზღვრო ზოლზე ასეთი ამორტიზებული გზების არსებობა მიუღებელია და საერთაშორისო პრესტიჟის საკითხიცაა.
სად არის გამოსავალი? გათვალისწინებულია თუ არა ბიუჯეტში გზის სარემონტო სამუშაოებისთვის თანხა?“- განაცხადა ზურაბ ქადაგიძემ.
ლაშა ხუციშვილმა ზურაბ ქადაგიძის კითხვის პასუხად განმარტა, რომ გზების მშენებლობისა და რეაბილიტაციისთვის გათვალისწინებული დაფინანსების ძირითადი ნაწილი ჩქაროსნული მაგისტრალების განვითარებას, ხოლო დარჩენილი თანხა შიდასახელმწიფოებრივი გზების მოწყობას მოხმარდება.
მინისტრის ინფორმაციით, სამცხე-ჯავახეთის საგზაო ინფრასტრუქტურის განვითარებისთვის 300 მილიონ ლარამდეა გათვალისწინებული, საიდანაც 100 მილიონი ლარი ხაშური-ახალციხის მონაკვეთისთვის გამოიყოფა. ასევე, მომდევნო წელს დაიწყება კარწახის გზის რეაბილიტაცია, რომლისთვისაც საჭირო თანხა უკვე გამოყოფილია.