ბულგარეთის თავდაცვის მინისტრის, დიმიტარ სტოიანოვის განცხადებით, მისი ქვეყანა უკრაინას იარაღს აღარ მიაწვდის. იგი დარწმუნებულია, რომ „რუსეთ-უკრაინის ომის ბედი ბრძოლის ველზე ვერ გადაწყდება“.
გამოცემა The Sofia Globe-ს ცნობით, ეს განცხადება სტოიანოვმა 9 ივნისს გამართულ პრესკონფერენციაზე გააკეთა.
„უკრაინას მეტი მებრძოლი სჭირდება და არა მეტი იარაღი. იარაღი მას საკმარისი აქვს, ამიტომ უკრაინული არმიისთვის დამატებით მის მიწოდებას არ ვაპირებთ. ჩვენ ვხედავთ, რომ მეომარი მხარეები ერთმანეთის გამოფიტვას ცდილობენ. ამიტომ, ერთადერთი, რასაც ბრძოლის ველზე იარაღის დაგროვება იწვევს, უფრო მეტი ადამიანის დაღუპვაა“, – განაცხადა ბულგარეთის თავდაცვის მინისტრმა.
მისი თქმით, დადგა მოლაპარაკებების მაგიდასთან დაჯდომის დრო, როდესაც კონფლიქტში ჩართულმა ორმა მხარემ უნდა განსაზღვროს, როგორ უნდა მივიდნენ „სამართლიან მშვიდობამდე“. მან ასევე ხაზი გაუსვა ევროკავშირის „უაღრესად მნიშვნელოვან“ როლს ამ პროცესში.
„რთულია ეს როლი მედიატორს მიანდო იმ მარტივი მიზეზის გამო, რომ ამ ომში ევროკავშირი უკვე უჭერს მხარს უკრაინას“, – აღნიშნა დიმიტარ სტოიანოვმა.
გამოცემა მკითხველს შეახსენებს, რომ სტოიანოვი პრემიერ-მინისტრ რუმენ რადევის ხელმძღვანელობით მოქმედი ბულგარეთის მთავრობის წევრია. თავად რადევს, რომელიც ბოლო ერთი თვეა იკავებს ამ თანამდებობას, უკრაინაზე ბევრი არაფერი უთქვამს, მანამდე კი ის კიევისთვის სამხედრო-ტექნიკური დახმარების გაწევას ეწინააღმდეგებოდა და ომის ექსკლუზიურად „დიპლომატიური გზით მოგვარების“ მოწოდებებით გამოდიოდა.
18 მაისს, გერმანიის კანცლერ ფრიდრიხ მერცთან ერთად გამართულ პრესკონფერენციაზე, რადევმა უკრაინაზე კომენტარი მხოლოდ მას შემდეგ გააკეთა, რაც ჟურნალისტებმა უშუალოდ მას დაუსვეს კითხვა.
„დადგა დიპლომატიის დრო, რადგან ეს გაჭიანურებული ომი ფიტავს ყველას, ვინც მასშია ჩართული და ვინც მას მხარს უჭერს“, – აღნიშნა მაშინ რადევმა.
შეგახსენებთ, რომ 30 მარტს უკრაინის პრეზიდენტმა, ვოლოდიმირ ზელენსკიმ გამოაცხადა, რომ ბულგარეთი შეუერთდებოდა უკრაინის პრიორიტეტული სამხედრო საჭიროებების სიას (PURL), რომელიც ევროპული ქვეყნების მიერ უკრაინის საჭიროებებისთვის ამერიკული იარაღის შესყიდვას ითვალისწინებს.
https://suspilne.media/1326795-bolgaria-bilse-ne-postacatime-zbrou-ukraini-ministr-oboroni-kraini/