ევროკავშირში ყველაზე დაბალი სამომხმარებლო ფასების მქონე ქვეყნის სტატუსი ბულგარეთმა 2025 წელსაც შეინარჩუნა. ევროკავშირის სტატისტიკის სამსახურის („ევროსტატი“) მონაცემებით, ბულგარეთში ფასების დონე ევროკავშირის საშუალო მაჩვენებლის მხოლოდ 63%-ს შეადგენს, რაც მას 27 წევრ სახელმწიფოს შორის, ძირითადი საქონლისა და მომსახურების ხელმისაწვდომობის თვალსაზრისით, პირველ ადგილზე აყენებს.
ბულგარეთის შემდეგ მოდის რუმინეთი, სადაც ფასების დონე ევროკავშირის საშუალო მაჩვენებლის 65%-ს შეადგენს, მესამე ადგილზე კი, 73%-ით, პოლონეთია. საპირისპირო მხარეს არიან დანია, სადაც ფასები ევროკავშირის საშუალო მაჩვენებელზე 40%-ით მაღალია, ირლანდია (+36%) და ლუქსემბურგი (+32%).
„ევროსტატის“ მონაცემები ადასტურებს, რომ ერთიანი ევროპული ბაზრის არსებობის მიუხედავად, ევროკავშირის ქვეყნებს შორის განსხვავება, ცხოვრების ღირებულების კუთხით, კვლავაც თვალშისაცემია.
განსაკუთრებით აღსანიშნავია ბულგარეთის მაჩვენებელი საცხოვრისზე გაწეულ ხარჯებში, რომელსაც საოჯახო ბიუჯეტებში, როგორც წესი, ყველაზე დიდი წილი უკავია. 2025 წელს ბულგარეთში საცხოვრებლის ღირებულება ევროკავშირის საშუალო მაჩვენებლის მხოლოდ 41%-ს შეადგენდა. ეს ყველაზე დაბალი მაჩვენებელია წევრ სახელმწიფოებს შორის და ოთხჯერ მეტით ჩამორჩება ირლანდიას, სადაც აღნიშნულ კატეგორიაში ყველაზე მაღალი მაჩვენებელი – 190% – დაფიქსირდა.
საკვებისა და უალკოჰოლო სასმელების კატეგორიაში ქვეყნებს შორის სხვაობა შედარებით მცირეა. ყველაზე მაღალი ფასები ლუქსემბურგში დაფიქსირდა, სადაც ისინი ევროკავშირის საშუალო მაჩვენებლის 122%-ს შეადგენს, ხოლო ყველაზე დაბალი – რუმინეთში (80%).
სტატისტიკის თანახმად, ევროკავშირის წევრ სახელმწიფოებს შორის ყველაზე დიდი განსხვავებები განათლების სფეროშია. ამ კატეგორიაში ფასების დონე მერყეობს ლუქსემბურგში დაფიქსირებული ევროკავშირის საშუალო მაჩვენებლის 334%-იდან, რუმინეთში დაფიქსირებულ 42%-მდე.
„ევროსტატის“ მონაცემები აჩვენებს, რომ ბულგარეთი ევროკავშირში კვლავ ყველაზე დაბალი სამომხმარებლო ფასების მქონე ქვეყანაა. მიუხედავად იმისა, რომ შედარებით დაბალი ფასები წევრ სახელმწიფოებს შორის შემოსავლების განსხვავებასაც ასახავს, ისინი, ამავდროულად, ხაზს უსვამს ქვეყნის კონკურენტულ უპირატესობას, ცხოვრების ღირებულებისა და ძირითადი საქონლისა და მომსახურების ხელმისაწვდომობის თვალსაზრისით.
https://bntnews.bg/news/evrostat-balgariya-e-s-nai-niski-razhodi-za-zhivot-v-es-1399135news.html