18 ივნისს, კუბელმა დეპუტატებმა ერთხმად დაამტკიცეს ფართომასშტაბიანი რეფორმების პროგრამა, რომელიც საბაზრო ეკონომიკაზე გადასვლას ისახავს მიზნად. ეს ნაბიჯი კომუნისტური კუნძულისთვის ისტორიული შემობრუნების მომენტს წარმოადგენს.
კუბის ეროვნული ასამბლეის 400 დეპუტატს მწვავე ეკონომიკური კრიზისისა და შეერთებული შტატების მხრიდან ინტენსიური ზეწოლის ფონზე მოუწია ეყარა კენჭი176 საკანონმდებლო წინადადებისთვის, რომლებიც ეკონომიკის სხვადასხვა სექტორის რეფორმირებას ითვალისწინებს.
„ეს არის ყველაზე შორსმიმავალი ეკონომიკური რეფორმების პროგრამა, რომელიც ბოლო 70 წლის განმავლობაში, 1959 წლის რევოლუციის გამარჯვების შემდეგ გამოცხადებულა“, – განუცხადა საინფორმაციო სააგენტო „ფრანს პრესს“ ლონდონში მცხოვრებმა კუბელმა ეკონომისტმა, დანიელ ტორალბასმა.
სახელმწიფო ტელევიზიით გადაცემული კადრების თანახმად, რეფორმები ხელის აწევით, ერთხმად დაამტკიცეს.
შემოთავაზებული ცვლილებები ეხება კერძო და სახელმწიფო საწარმოების საქმიანობის ორგანიზებას, საბანკო სექტორს, ტურიზმს, სოფლის მეურნეობას, უცხოურ ინვესტიციებს, საგადასახადო პოლიტიკას, ხელფასებსა და სავალუტო ბაზარს.
პარლამენტის მიერ დამტკიცებულ რეფორმებს შორის განსაკუთრებით აღსანიშნავია სახელმწიფო საწარმოების გარდაქმნა სააქციო ან წილობრივი კაპიტალის მქონე კომერციულ კომპანიებად, კერძო კომპანიებისთვის 100-ზე მეტი ადამიანის დასაქმების ნებართვა, კერძო სექტორში უცხოური კაპიტალის მონაწილეობა და კერძო პირებისთვის უცხოური ვალუტის ანგარიშების გახსნა.
„უბრალო, ზედაპირულ ცვლილებებთან ნამდვილად არ გვაქვს საქმე – ეს რადიკალური რეფორმებია; შემოთავაზებული რეფორმების უმეტესობა კუბის ეკონომიკაში კერძო სექტორის როლის გაზრდას ემსახურება“, – ხაზგასმით აღნიშნა ტორალბასმა.
თუმცა, ამ დროისთვის არ არსებობს საკანონმდებლო ცვლილებების ძალაში შესვლის გრაფიკი, არც რაიმე მინიშნება იმაზე, რომ პოლიტიკურ სისტემას, რომელშიც კუბის კომუნისტური პარტია ექსკლუზიურად დომინირებს, რაიმე საფრთხე ემუქრება.
„ეს არის ცვლილებები, რომლებიც შეცდომების გამოსასწორებლად შემუშავდა და მისი მიზანი სოციალიზმის დაცვაა“, – განაცხადა კუბის პრეზიდენტმა, მიგელ დიას-კანელმა კენჭისყრის შემდეგ.
წინა დღით, სწორედ კომუნისტური პარტიის ცენტრალურმა კომიტეტმა აუნთო მწვანე შუქი რეფორმების ამ პაკეტს, რომელიც ეკონომიკის შემდგომი ლიბერალიზაციისკენ არის მიმართული.
რეფორმები კუბაში იმ დროს ხორციელდება, როდესაც აშშ-ის პრეზიდენტი, დონალდ ტრამპი კუნძულის მიმართ მაქსიმალური ზეწოლის პოლიტიკას ატარებს.
თითქმის ხუთი თვეა, კუბა ბლოკადის პირობებში იმყოფება, რამაც 1962 წლიდან მოქმედი ემბარგოს ქვეშ მყოფი ქვეყნის ეკონომიკა კოლაფსის ზღვარზე მიიყვანა. შედეგად, ქვეყანაში გახშირდა ელექტროენერგიის ფართომასშტაბიანი გათიშვები და სურსათის, საწვავის, სასმელი წყლისა და მედიკამენტების მწვავე დეფიციტი შეიქმნა.
ვაშინგტონი არ მალავს თავის სურვილს, ფლორიდის სანაპიროდან დაახლოებით 150 კილომეტრში მდებარე კუნძულზე ეკონომიკური მოდელის ან თუნდაც პოლიტიკური სისტემის შეცვლას მიაღწიოს.
„თუ ისინი გონივრულ გადაწყვეტილებებს მიიღებენ, ჩვენ ამ კუნძულთან ბევრად უკეთესი ურთიერთობა გვექნება“, – განაცხადა აშშ-ის ვიცე-პრეზიდენტმა, ჯეი დი ვენსმა, როდესაც მას კუბაში შესაძლო სამხედრო ინტერვენციის შესახებ შეკითხვა დაუსვეს.
https://www.rtp.pt/noticias/economia/parlamento-cubano-aprova-viragem-economica-historica_n1748070