ადგილობრივი მედიის მიერ კვირას, 5 ივლისს გავრცელებული ინფორმაციით, სალონიკის მახლობლად მდებარე ქალაქ ორეოკასტროში, სადაც შაბათს მშრალ მინდორზე გაჩენილი ხანძარი ღამის განმავლობაში სამრეწველო ზონასაც მოედო, აქტიური კერები აღარ ფიქსირდება, გარდა გადამამუშავებელი საწარმოს ტერიტორიისა, სადაც ხანძარი ისევ მძვინვარებს.
მედიის ცნობით, კვირას ხანძრის ჩაქრობაში დაახლოებით 160 მეხანძრე იყო ჩართული. ადგილზე მუშაობდა 52 სახანძრო მანქანა, 5 სახმელეთო ოპერატიული ჯგუფი და 2 სახანძრო თვითმფრინავი.
მეხანძრეები მთელი ღამის განმავლობაში იბრძოდნენ ხანძრის შესაკავებლად, რომელიც საფრთხეს უქმნიდა საცხოვრებელ სახლებს, ნარჩენების გადამამუშავებელ ქარხანასა და ტექსტილის საწარმოს. სხვადასხვა ხარისხით დაზიანდა სახლები, საწყობები და ინფრასტრუქტურა.
მიმდებარე დასახლებების მცხოვრებლებს გაეგზავნათ საგანგებო შეტყობინებები, რომლებითაც მათ ევაკუაციისკენ მოუწოდებდნენ და აფრთხილებდნენ, რომ ხანძრის შედეგად გამოყოფილი ტოქსიკური კვამლის გამო აუცილებელი იყო სიფრთხილის ზომების დაცვა.