„ფორმულას“ ჟურნალისტი ვახო სანაია სოციალურ ქსელში შეურაცხმყოფელი კომენტარისთვის სასამართლომ სამართალდამრღვევად სცნო და მას 6 000-ლარიანი ჯარიმა დააკისრა. მოსამართლის განცხადებით, შეურაცხმყოფელი კომენტარის გამო სანაიას უკვე დაკისრებული აქვს ჯარიმა, რომელიც ამ დრომდე გადახდილი არ არის.
სოციალურ ქსელში შეურაცხმყოფელი კომენტარისთვის სასამართლომ სამართალდამრღვევად ცნო მაია დარსმელიძეც. მას ჯარიმის სახით 2800 ლარის გადახდა დაეკისრა.
შინაგან საქმეთა სამინისტროს იურისტმა მარიამ კერესელიძემ მედიასთან აღნიშნულ საქმეებზე განმარტება გააკეთა.
„მოწინააღმდეგე მხარემ ახსნა, რომ გაბრაზებული იყო ქალბატონი მაია და სწორედ ამიტომ მოხდა მისი მხრიდან შეურაცხყოფის მიყენება და შინაგან საქმეთა სამინისტროსგან მოითხოვა იმის დასაბუთება, რომ ქალბატონი ნინო ჯღარკავა ადამიანია და არა ხელოვნური ინტელექტი. ეს რა თქმა უნდა, სცილდება ყოველნაირ სამართლებრივ დასაბუთებას და ბუნებრივია, ვერ იქნებოდა გათვალისწინებული.
დღეს სასამართლომ განიხილა ვახტანგ სანაიას საქმე, რომელმაც სიტყვიერი შეურაცხყოფა მიაყენა შალვა პაპუაშვილსა და ვლადიმერ ბოჟაძეს. მოცემული საქმე მნიშვნელოვანი იყო იმით, რომ ბატონი ვახტანგ სანაია თავის პოსტში თითქოსდა ცდილობდა, დისტანცირება მოეხდინა შეურაცხმყოფელი გამონათქვამებისაგან და საზოგადოებას მოუწოდებდა, არ გაემეორებინათ. მაგრამ შინაგან საქმეთა სამინისტრო მიიჩნევს, რომ ეს იყო ფორმალური დისტანცირება და რეალურად აღნიშნული წარმოადგენდა ირონიულ და მოჩვენებით შეურაცხყოფის ფორმას, რაც სასამართლო პრაქტიკაში მიჩნეულია ამგვარად – შესაბამისად, გაზიარებული იქნა სასამართლოს მიერ და ბატონი ვახტანგ სანაია დაჯარიმდა 6000 ლარის ოდენობით“, – განაცხადა მარიამ კერესელიძემ მედიასთან.