ტორონტოში, სალსას ფესტივალზე სროლის შედეგად, სულ მცირე, ორი ადამიანი დაიღუპა. კანადის ამ ქალაქის პოლიციამ პირველი შეტყობინებები სროლის შესახებ ადგილობრივი დროით დაახლოებით 20:12 საათზე მიიღო.
სამართალდამცველებმა ცეცხლსასროლი იარაღით დაჭრილი 6 ადამიანი იპოვეს. მათივე განცხადებით, 2 ადამიანი ადგილზევე გარდაცვლილი გამოცხადდა. ინციდენტის დროს ფესტივალზე, სავარაუდოდ, 13 000-მდე ადამიანი იმყოფებოდა
სროლიდან რამდენიმე საათში გამართულ პრესკონფერენციაზე პოლიციამ განაცხადა, რომ ფესტივალზე ორ პირს შორის ორმხრივი სროლა მოხდა. გამოძიება გრძელდება. ამ დროისთვის დაკავებული არავინაა.
კანადის პრემიერ-მინისტრმა, მარკ კარნიმ განაცხადა, რომ მომხდარით „შეძრწუნებულია“ და თანაგრძნობა გამოუცხადა „იმ ოჯახებს, რომლებიც გლოვობენ საყვარელ ადამიანებს, მათ, ვინც კრიტიკულ მდგომარეობაში იმყოფება და ყველას, ვისაც ეს საშინელი ტრაგედია შეეხო“.