„თვითმფრინავში მყოფი ბორტგამცილებლებიდან არავინ დაგვხმარებია“, – ჰყვება 61 წლის სერბი ლიუბიშა კაროვიჩის მეუღლე, რომელიც დაბალბიუჯეტიანი ავიაკომპანიის რეისზე გატეხილი ილუმინატორიდან ჰაერის ნაკადმა გარეთ „გაიწოვა“. ინციდენტი გასულ პარასკევს სალონიკიდან გერმანიაში, მემინგენის აეროპორტის მიმართულებით ფრენისას მოხდა, როდესაც, სავარაუდოდ, თვითმფრინავის ძრავას ნაწილი მოტყდა, ერთ-ერთ ილუმინატორს მოხვდა და სალონში ჰერმეტიზაციის დარღვევა გამოიწვია.
„ფრენის დაწყებიდან დაახლოებით 40 წუთის შემდეგ წარმოუდგენლად ხმამაღალი დაჯახების ხმა გავიგონე. არც კი ვიცი, რა დავარქვა – ჩემს ცხოვრებაში უფრო ხმამაღალი არაფერი გამიგონია. მეუღლისკენ შევტრიალდი და დავინახე, რომ მისი სხეულის ნაწილი ილუმინატორიდან უკვე გარეთ იყო „გაწოვილი“. გვერდით მჯდომი ქალი მის შეკავებას ცდილობდა. დასახმარებლად წამოვხტი, მაგრამ უბრალოდ ძალა არ გვეყო და უკან გამოთრევა ვერ შევძელით. თუმცა, გასასვლელის მეორე მხრიდან ერთი კაცი გადმოვიდა და ერთად მოვახერხეთ ჩემი მეუღლის უკან, სალონში შემოთრევა“, – განუცხადა სვეტლანა გარკოვიჩმა სააგენტო „როიტერს“.
BBC-ის მიერ გავრცელებულ, თვითმფრინავის სალონში გადაღებულ კადრებში ჩანს, რომ ორი ქალი მამაკაცს ფეხებით აკავებს, ხოლო სხვა მგზავრები თავიანთ ადგილებზე სხედან და ჟანგბადის ნიღბები უკეთიათ. გასასვლელში ან მათ გარშემო ეკიპაჟის არცერთი წევრი არ ჩანს.
„ყველა საკუთარი თავის გადარჩენაზე იყო ფოკუსირებული… ბორტგამცილებლებიც თვითმფრინავის წინა ნაწილში იყვნენ გადასულნი და ჟანგბადის ნიღბები ეკეთათ. ჩვენს დასახმარებლად არავინ მოსულა. ბორტგამცილებელი მხოლოდ მას შემდეგ მომიახლოვდა, რაც სალონიკში დავეშვით“, – ამბობს გარკოვიჩი და დასძენს, რომ მისი ერთადერთი ფიქრი ის იყო, რომ თუ სიკვდილი ეწერათ, ერთად დაიხოცებოდნენ.
ინციდენტის დროს, მისმა ქმარმა სამჯერ დაკარგა გონება და ამჟამად საავადმყოფოში მკურნალობს, თავისა და სხეულის ზედა ნაწილის მძიმე დაზიანებების გამო.
საქმის გამოძიებას ჩრდილოეთ მაკედონიის რესპუბლიკა აწარმოებს, რომლის ტერიტორიაზეც მოხდა ინციდენტი. გამოძიებაში ასევე ჩართულები არიან აშშ-ის ტრანსპორტის უსაფრთხოების ეროვნული საბჭო და ევროკავშირის ავიაციის უსაფრთხოების სააგენტო. გამოძიება დაიწყო ბერძენმა პროკურორმაც. თვითმფრინავი კვლავ საბერძნეთში რჩება.
დაბალბიუჯეტიანმა ავიაკომპანიამ მხოლოდ ის დაადასტურა, რომ ფრენის დროს ილუმინატორი გაიბზარა და გამოძიების დასრულებამდე კომენტარის გაკეთებაზე უარი თქვა.
https://bntnews.bg/news/nikoi-ot-styuardite-ne-pomogna-govori-zhenata-na-mazha-koito-za-malko-ne-zagina-zasmukan-ot-prozorec-na-samolet-1403315news.html