პარტია „ხალხის ძალის“ წევრი დავით ქართველიშვილი სოციალურ ქსელში ბოლო დღეებში განვითარებულ მოვლენებს ეხმიანება და საზოგადოებაში გავრცელებულ პანიკურ განწყობებს აკრიტიკებს.
ექსპერტი მოუწოდებს საზოგადოებას, თავი შეიკავონ დაუდასტურებელი ვერსიების გავრცელებისა და მოვლენების შეფასებისას ზედმეტი პანიკის შექმნისგან.
„ვინც ბოლო დღეების მოვლენებზე – პროზექტურაში ცვილის ფიგურების გამოცოცხლების გჯერათ… ვისაც ჰგონია, რომ ცნობადი ყოფილების გარდა – ამ ქვეყანაში უცნობი მოქმედები აღარ არიან… ვინც განპიროვნებული ძალაუფლების მომხრეა და ზოგადი პრინციპების ერთგულებაში მოიკოჭლებს… ვისაც ადამიანებთან გადაღებული სელფები – ნაკურთხი ხატები ჰგონია და აქედან, ვისზე ილოცონ, აღარ იციან… ნუ დაგვღალეთ, შავღონდით თქვენი „გვეშველებარამეთი“.
ცალკე ხომ 3D-ფორმატში ამ წუთისოფლის ამოცნობაში მოიკოჭლებთ, ან X-ღერძის მიმართულებით მოძრაობთ, ან Y-ღერძზე ძვრებით – უკეთეს შემთხვევაში, მათ გადაკვეთაში, „ზეროში“ რომ ჩაცურდეთ, ხოლო Z-ღერძის გავლებას საჭიროდაც არ თვლით: თუ რაღაც არ გესმით – ცოდვა არაა! თეორიული მექანიკა – რა არის, დღემდე არ მესმის! მაგრამ – ამ სოციალურ ქსელებში ნუ გადმოგაქვთ მასიურად: „ვერ ხვდები, რა ხდება და მითხარით!“.
რა მიზნით ინტერესდებით? საკუთარ ორჭოფობაში – გარედან გაძლიერების მიზნით? აქამდე ვერ გაძლიერდით ვერც უფლით, ვერც ღვთისმშობლით, ვერც ლოცვით, ვერც მარხვით, ვერც ქვეყნით, ვერც წინაპრით, ვერც ოჯახით? ვერც იმ ადამიანის მიმართ ჩამოყალიბდით ბოლომდე – რომელსაც ამ ქვეყნისთვის არ უღალატია? რომელმაც საკუთარი სიცოცხლე, ოჯახი, რეპუტაცია, კაპიტალი – ლარნაკზე მიართვა ყველაფრით მუდმივად უკმაყოფილო ამ ერს?
მის მიერ დაშვებულ შეცდომებს უთვლით – და რომელია საბედისწერო? გაქრა ამ ქვეყანაში ადამიანები, რომლებიც არ იღლებიან ყოველდღიური ბრძოლით – რასაც უმეტესობა უსასყიდლოდ აკეთებს? გაქრა ადამიანები – რომლებიც ეკლესიური წესით ცხოვრებით დარწმუნებულები არიან, რომ უფალი ჩვენთან არს?
თქვენი სისუსტეების და პერსონიფიცირებული მედროვეობის საჯარო რეკლამირებით აღარ გადაიღალეთ? აკეთეთ თქვენი საქმე პირნათლად! უფალს არ უღალატოთ, იმ მამულიშვილის წინაშე, რომელიც არ გადაღლილა და საკუთარი გარემოცვის გამო სტრესში არ ვარდება – ეროვნული მადლიერების გრძნობა შეინარჩუნეთ.
და მთავარი – თუ რამე არ გესმით, თუ რამეს ვერ ხვდებით – ნუ დაგვაინფიცირებთ უადგილო პანიკებით. ამის დრო არაა,”- წერს დავით ქართველიშვილი.