„ირანის ისლამური რევოლუციის გუშაგთა კორპუსში“ აშშ-ის მხრიდან ახალი თავდასხმების მუქარის საპასუხოდ განაცხადეს, რომ ვაშინგტონი მსგავსი ქმედებებით „მხოლოდ მარცხს“ მიიღებს.
„ტრამპს ავიწყდება, რომ მან ადრეც გააჟღერა მუქარები, თუმცა მათი განხორციელება ვერ შეძლო. ახლა კი კვლავ იმუქრება“, – განაცხადა „ირანის ისლამური რევოლუციის გუშაგთა კორპუსის“ პრესსპიკერმა, ჰოსეინ მოჰებიმ.
ირანის შეიარაღებული ძალების გენერალურ შტაბში კი აცხადებენ, რომ აშშ-ის მხრიდან ახალი თავდასხმის შემთხვევაში თეირანი „კიდევ უფრო მკაცრ, გამანადგურებელ და არაპროგნოზირებად დარტყმებს“ განახორციელებს.
როგორც შტაბში აღნიშნავენ, აშშ-ის მხრიდან „უსაფუძვლო ბრალდებებისა და მუქარების“ განმეორება სიძლიერის ნიშნად არ უნდა იყოს აღქმული.
ამასთან, ირანის პარლამენტის სპიკერის, მოჰამედ ბაღერ ღალიბაფის განცხადებით, აშშ-ის მხრიდან ზეწოლის მიუხედავად, თეირანი არ დანებდება და არც თავის საქმიანობას შეწყვეტს.
„ჩვენ არასდროს დავნებდებით და ქვეყნის ფუნქციონირებას არ შევწყვეტთ. ჩვენ ძალით ვუპასუხებთ, როგორც ამას აქამდე ვაკეთებდით, და მტერს ყველა მიმართულებით მოქმედების უნარი დავაკარგინეთ“, – განაცხადა ღალიბაფმა.
ცნობისთვის, აშშ-ის პრეზიდენტმა, დონალდ ტრამპმა გაერო-ს გენერალურ ასამბლეაზე სიტყვით გამოსვლისას განაცხადა, რომ თეირანის ბირთვული ამბიციებისა და ტერორიზმის დასასრულებლად გადამწყვეტი ნაბიჯები უკვე გადაიდგა. ამასთან, აშშ-ის ლიდერმა აღნიშნა, რომ მიუხედავად განადგურებული სამხედრო ინფრასტრუქტურისა, მის წინაშე მნიშვნელოვანი დილემა დგას – წავიდეს ირანთან ახალ გარიგებაზე, თუ საბოლოოდ გაანადგუროს რეჟიმი. ტრამპის თქმით, იგი ელოდება, რომ ოფიციალური თეირანი შეთანხმებას აშშ-ის შუალედური არჩევნების დასრულებისთანავე დათანხმდება.