აშშ-ის პრეზიდენტის დონალდ ტრამპის განცხადებით, უკრაინის პრეზიდენტის ვოლოდიმირ ზელენსკისა და რუსეთის ლიდერის ვლადიმირ პუტინის შეხვედრა „ძალიან მალე“ დაიგეგმება.
ტრამპის თქმით, ვაშინგტონი უკრაინაში რუსეთის ომის დასრულების საკითხზე მოსკოვთან მნიშვნელოვან პროგრესს აღწევს. მას შეხვედრის თარიღი და ადგილი არ დაუკონკრეტებია.
„შეხვედრა ძალიან მალე დაიგეგმება“, – განუცხადა ტრამპმა ჟურნალისტებს უკრაინისა და რუსეთის პრეზიდენტების შესაძლო შეხვედრაზე საუბრისას.
„რუსეთ-უკრაინის საკითხზე მნიშვნელოვან პროგრესს ვაღწევთ“, – დასძინა აშშ-ის პრეზიდენტმა.
აღსანიშნავია, რომ ტრამპის განცხადება წინ უძღვის ნოემბერში დაგეგმილ სამმხრივ მოლაპარაკებებს, რომელშიც უკრაინის, აშშ-ისა და რუსეთის წარმომადგენლები უნდა მონაწილეობდნენ. თუმცა, ამ ეტაპზე საუბარია მოლაპარაკებების ჯგუფების შეხვედრაზე და არა უშუალოდ პრეზიდენტების სამიტზე. უკრაინის პრეზიდენტის ვოლოდიმირ ზელენსკის განცხადებით, მოლაპარაკებების მიზანი ომის დასრულების გზების განხილვა და ლიდერების შეხვედრის მომზადებაცაა.