იმედით ვუყურებ თქვენს ჩამობრძანებას საქართველოში, თქვენი ლოცვით, იმედია, გამთლიანდება საქართველო, დამშვიდდება საქართველოს ეკლესია, – განაცხადა სრულიად კათოლიკოს-პატრიარქმა ილია მეორემ საქართველოში წმინდა დიდმოწამე ქეთევან დედოფლის წმინდა ნაწილის ჩამობრძანებისას.
ქეთევან დედოფლის წმინდა ნაწილები თბილისში დღეს ჩამოაბრძანეს. წმინდა ნაწილების დასახვედრად თბილისის სამთავრობო აეროპორტში სასულიერო და საერო პირები შეიკრიბნენ.
პატრიარქის თქმით, ხალხი დიდი მოწიწებით მიესალმება სამშობლოში წმინდა ქეთევან დედოფლის წმინდა ნაწილების დაბრუნებას.
პატრიარქმა იმედი გამოთქვა, რომ ჩვენი მომავალი იქნება კეთილი და მშვიდობიანი.
„იმედია, რომ ჩვენი მომავალი იქნება კეთილი და მშვიდობიანი. გიხაროდეს ფრიად მშვენიერო, მოწამეთა შორის, გიხაროდეს ქეთევან დედოფალო, ბრწინვალეო გვირგვინოსანთა შორის!” – ბრძანა უწმინდესმა.