„აფბა” ფილანთროპიის ინდექსის შემუშავებას იწყებს

საქველმოქმედო ორგანიზაციების გამჭვირვალობის საკითხი აქტუალობას არ კარგავს.
საზოგადოების უდიდესი ნაწილისთვის კვლავ პასუხგაუცემელია კითხვა, თუ რამდენად გამჭვირვალედ და მიზნობრივად იხარჯება საქველმოქმედო ფონდებიდან საზოგადოების მიერ გაღებული სახსრები,- ამის შესახებ „კვირას” პრესკლუბში გამართულ პრესკონფერენციაზე „ახალგაზრდა ბიზნესმენთა და ფინანსისტთა” ასოციაციის ვიცე-პრეზიდენტმა ანდრია გვიდიანმა განაცხადა. გვიდიანის ინფორმაციით, საქველმოქმედო ფონდ „იავნანას“ ირგვლივ შექმნილი სკანდალის შემდეგ, „ახალგაზრდა ფინანსისტთა და ბიზნესმენთა ასოციაციამ“ საქართველოში რეგისტრირებული ყველა მოქმედი საქველმოქმედო ორგანიზაციის შესწავლა დაიწყო. როგორც გვიდიანი ამბობს, „აფბას” მიერ მოხდა ყველა ორგანიზაციისთვის შესაბამისი მოთხოვნის გაგზავნა, სადაც ჩვენი ორგანიზაცია ფონდებისგან აუდიტორულ დასკვნებს და შესაბამის ფინანსურ დოკუმენტაციას ითხოვს.
„დროულად მიგვაჩნია შევიმუშაოთ ფილანთროპიის ინდექსი, რომლითაც, ფინანსური დოკუმენტაციის რუტინული ანალიზის შემდეგ, მოსახლეობას პირუთვნელად მივაწვდით ინფორმაციას, თუ რამდენად ეფექტურად მუშაობენ საქართველოში საქველმოქმედო ორგანიზაციები. აფბას ფილანთროპიის ინდექსის განმსაზღვრელი იქნება 3 ძირითადი ინსტრუმენტი, რომლის საშუალებითაც შეფასდება და შესაბამისი ინდექსი მიენიჭება საქართველოში მოქმედ ყველა საქველმოქმედო ორგანიზაციას. გამჭვირვალობა არის ერთ-ერთი ყველაზე მნიშვნელოვანი მიმართულება, რომლითაც საქველმოქმედო ორგანიზაცია უნდა გამოირჩეოდეს. შესაბამისად, აღნიშნული მიმართულებით შეფასდება ორგანიზაციების ტრანსფარენტულობის დონე და საზოგადოების წინაშე ანგარიშვალდებულება. მიზნობრიობა იქნება ძირითადი მიმართულება, რომლის მიხედვითაც, საქველმოქმედო ორგანიზაციების ფუნქციონირება შეფასდება. ფონდებში აკუმულირებული ხარჯების მიზნობრივად განკარგვა არის ფონდების საქმიანობის ძირითადი ფუნქცია. შესაბამისად, „აფბა” დეტალურად შეისწავლის საქველმოქმედო ორგანიზაციების მიერ გაწეული ხარჯების მიზნობრიობის საკითხს. ჩართულობის მიხედვით შეფასდება საქველმოქმედო ორგანიზაციების მხრიდან მათი საქმიანობის დაფარვის არეალი. ამ მიმართულებით, მნიშვნელოვანია შეფასდეს რამდენად აქტიურად არის ორგანიზაცია ფოკუსირებული ქვეყანაში არსებულ მძიმე პრობლემების მოგვარებაზე.
„ახალგაზრდა ფინანსისტთა და ბიზნესმენთა ასოციაცია“ კიდევ ერთხელ მოვუწოდებთ საქველმოქმედო ორგანიზაციებს, მოგვაწოდონ დეტალური ანგარიშგებები და აუდიტორული დოკუმენტაცია მათი წარსული და მიმდინარე საქმიანობის შესახებ. აგრეთვე, მნიშვნელოვანია საქველმოქმედო ორგანიზაციებმა ფართო საზოგადოებისათვის საჯარო გახადონ საკუთარი საქმიანობის პრიორიტეტები და სტანდარტები. იმედს ვიტოვებთ, „აფბას” და საქველმოქმედო ფონდებს შორის თანამშრომლობა იქნება ეფექტური და კონსტრუქციული”, -განაცხადა ანდრია გვიდიანმა „კვირას” პრესკლუბში გამართულ პრესკონფერენციაზე.