მთამსვლელები არჩილ ბადრიაშვილი, გიორგი ტეფნაძე და ბაქარ გელაშვილი პირველები არიან, რომლებმაც ჰიმალაის მთებში ქართული გზა გაკვალეს. ამის შესახებ ინფორმაციას “ამერიკის ხმა” ავრცელებს.
სიდიდით მსოფლიოს რიგით მერვე მთის მანასლუს (8156) იგივე “სულის მთის” სიახლოვეს მდებარე მწვერვალი ლარკია ქართველმა მთამსველებმა დაიპყრეს. ლარკიას სიმაღლე 6425 მეტრი, კედელი – 700 მეტრი, ხოლო ასვლის სირთuლე 6A კატეგორიით არის შეფასებული.
.jpg)
ლარკიას კედელი/ ფოტო ამერიკის ხმა
ამერიკის ხმის ცნობით, ქართველ მთამსვლელებამდე ლარკიას მწვერვალზე არავინ ასულა და “მისი ფერდობების შესახებ მთელი ინფორმაცია, სამიოდე შორი პანორამული ფოტოთი და სატელიტით მიღებული ზოგადი, მოძველებული ცნობებით შემოიფარგლებოდა.”
ქართული ექსპედიცია ნეპალის დედალაქ კატმანდუში 8 სექტემბერს ჩაფრინდა. იქ მათ, მეოთხე წევრი, ევერესტზე სამჯერ ნამყოფი გია თორთლაძე შეუერთდა.
ალპინისტებმა ლარკიას მწვერვალი 9 დღეში დაიპყრეს. 27 სექტემბერს, საღამოს 8 საათზე კი ჰიმალაებში პირველი ქართული გზა გაიჭრა და ქართველი მთამსვლელებმა ლარკიას უმაღლეს წერტილს მიაღწიეს.
ღამისთევა ლარკიას კედელზე / ფოტო ამერიკის ხმა
ფოტო: ამერიკის ხმა
27 წლის არჩილ ბადრიაშვილისა და 28 წლის გიორგი ტეფნაძის წყვილი ნოვატორული ასვლებით აქამდეც გამორჩეული იყო. 2014 წლიდან, მათ ათამდე პირველი ქართული გზა და ახალი მარშრუტი დაუგროვდათ. მათ შორის, ჭაუხებში ასათიანის სვეტზე, უშბაზე, ჯანღაზე, სინდაურაზე (აღმაშენებელზე), მყინვარწვერზე (გველეშაპის კლდე) , ჯავახიშვილზე, შხარაზე, ტიან შანის ალა-არჩას ხეობაში – კორონას სვეტზე, იქვე, ვაჟა-ფშაველასა და ხან-თეგრიზე, რომელიც არჩილისთვის – პირველი, ხოლო გიორგისთვის – მესამე შვიდიათასიანი იყო.
ზუსტად, ერთი წლის წინ კი ბიჭებმა 31 წლის ბორჯომელ ბაქარ გელაშვილთან ერთად, კავკასიონზე, 6A სირთულის, ჩათინის ჩრდილოეთ კედელიც დაძლიეს, სადაც ქართული ასვლა 1996 წლის შემდეგ აღარ განხორციელებულა.
ჰიმალაი / ფოტო ამერიკის ხმა
ყველა პირველი ქართული გზა და ახალი მარშრუტი ოფიციალურად რეგისტრირებულია ავტორიტეტული American Alpine Club-ის მიერ, ხოლო ლარკიაზე პირველი ქართული ასვლა Himalayan Database-ის ყურადღების ცენტრში მოექცა.