სოფელ ყიზილაჯლოში დაჭრილთაგან ორის პირის მდგომარეობა სტაბილურად მძიმეა, რჩებიან ხელოვნური სუნთქვის აპარატზე, დაცვითი ნარკოზის ქვეშ, – ამის შესახებ მარნეულის საავადმყოფოს გადაუდებელი დახმარების განყოფილების ექიმმა, თეა ზარიძემ განაცხადა.
„დაახლოებით 23:30 საათზე შემოვიდა ოთხი პაციენტი. ოთხივეს მიყენებული ჰქონდა ჭრილობები ცეცხლსასროლი იარაღით. ორ მათგანს ჩაუტარდა ქირურგიული ოპერაცია. ამჟამად იმყოფებიან რეანიმაციულ განყოფილებაში. სტაბილურად მძიმე რჩება მათი მდგომარეობა. რჩებიან ხელოვნური სუნთქვის აპარატზე, დაცვითი ნარკოზის ქვეშ. ორივე პაციენტის შემთხვევაში, რომელთაც ოპერაციები ჩაუტარდათ, არის მუცლის ღრუს შემავალი ჭრილობები, ნაწლავების დაზიანებით, მთლიანობის დარღვევით. მათი მდგომარეობა მძიმეა, მაგრამ სტაბილური. პროგნოზს ვერ გავაკეთებთ, რადგან სულ რამდენიმე საათია გასული“, – განაცხადა თეა ზარიძემ.
რაც შეეხება კიდევ ორ დაჭრილს, ექიმის თქმით, მათ კიდურების არეში აქვთ ჭრილობები.
„დანარჩენ ორ პაციენტს აღენიშნება რბილი ქსოვილების დაზიანება, არასისხლმდენი ჭრილობები. მსუბუქად არიან დაშავებული და რჩებიან მეთვალყურეობის ქვეშ“, – აღნიშნა თეა ზარიძემ.
როგორც პირველი არხის ჟურნალისტი მარნეულიდან იუწყება, მეხუთე დაჭრილი „ავერსის“ კლინიკაში იყო გადაყვანილი და მან საავადმყოფო უკვე დატოვა.
შეგახსენებთ, მარნეულის რაიონის სოფელ ყიზილაჯლოში თავდასხმა რამდენიმე საათის წინ მოხდა. „ქართული ოცნების“ მაჟორიტარობის კანდიდატს და მის თანმხლებ ოთხ პირს ცეცხლსასროლი იარაღიდან ესროლეს. მაჟორიტარობის კანდიდატს და მისი თანმხლები პირებიდან ერთს გადაუდებელი ოპერაცია ჩაუტარდათ. ჯანდაცვის მინისტრის ინფორმაციით, დაჭრილია სულ ხუთი პირი, ორი მათგანის ოპერაცია დასრულდა და მხოლოდ ერთის მდგომარეობა რჩება მძიმე. ადგილზე ჩავიდა და კომენტარი გააკეთა შინაგან საქმეთა მინისტრმა. მარნეულში ასევე ჩავიდა საპარლამენტო უმრავლესობის ლიდერი არჩილ თალაკვაძე.
- წყარო: პირველი არხი