ტყემალაძე ოპოზიციას პასუხობს

თბილისის საკრებულოს თავმჯდომარე გიორგი ტყემალაძე ოპოზიციის იმ განცხადებას ეხმაურება, რომ თითქოს თბილისის მერი კახა კალაძე საკრებულოში მთავრობის ახალ წევრებს თავად არ წარადგენს.
გიორგი ტყემალაძე აღშფოთებას ვერ მალავს და აღნიშნავს, რომ რატომ ჰქონდა მოლოდინი ოპოზიციას, რომ კახა კალაძე საკრებულოში მთავრობის ახალ წევრებს თავად წარადგენდა.
მისივე განმარტებით, ყველაფერი რეგლამენტისა და კანონის შესაბამისად ხდება.
”ამას ითვალისწინებს პროცედურა, რომ მერი ოფიციალურად, წერილობით წარადგენს საკერებულოში კანდიდატურებს, თანამდებობის პირებს, ხოლო მისი მოსვლა საკრებულოში რეგლამენტით გათვალისწინებული არ არის. შესაბამისად, ეს არის ნორმალური პროცესი. ვერ გამახსენებთ ვერც ერთ ფაქტს, როცა თანამდებობაზე პირის წარდგენა ხდებოდა მერის მხრიდან. ამიტომ, მე უბრალოდ მიკვირს ის, თუ რატომ აქვთ იმის მოლოდინი, რომ აუცილებლად მერმა უნდა წარადგინოს საკრებულოში თანამდებობის პირები”, – განაცხადა გიორგი ტყემალაძემ.
საკრებულოს თავმჯდომარე მიიჩნევს, რომ მერისა და საკრებულოს ურთიერთობა ძალიან კარგად დაიწყო.
შეგახსენებთ, რომ ფრაქცია “ევროპული საქართველო – თბილისის” თავმჯდომარემ, გოკა გაბაშვილმა დღეს განაცხადა, რომ თბილისის ახლად არჩეული მერი კახა კალაძე საკრებულოში მთავრობის ახალ წევრებს თავად არ წარადგენს.
მისივე თქმით, ახალ წევრებს საკრებულოში მერის ჯერ კიდევ დაუმტკიცებელი მოადგილე ირაკლი ხმალაძე წარადგენს.