აზარტული თამაშით გართულს აღარ აქვს ძალა, რომ იშრომოს, ისწავლოს, ოჯახი შექმნას, – ამის შესახებ მამა ანდრია ჯაღმაიძემ სამების საკათედრო ახალგაზრდულ ცენტრში განაცხადა, სადაც აზარტული თამაშების თემაზე შეხვედრა გაიმართა.
მისივე თქმით, შაბათის შეხვედრები საქართველოს კათოლიკოს-პატრიარქის, უწმინდესისა და უნეტარესის ილია მეორის ინიცირებულია.
დეკანოზის განცხადებით, დღეს გაიმართა ძალიან საინტერესო შეხვედრა. მისივე თქმით, აზარტულ თამაშებთან დაკავშირებით მნიშვნელოვანი ინიციატივა მზადდება.
“პრობლემა არის გლობალური. ამ აზარტული თამაშებით ზიანდებიან ახალგაზრდები, მათ უკან მდგომი ადამიანები დიდ განსაცდელში არიან. საზოგადოების არც ერთი ფენა არ დარჩენილა, რომელსაც ეს პრობლემა არ ეხება – გაპარტახებული ოჯახები, ახალგაზრდები, რომლებიც ასოციალურები არიან იმის გამო, რომ სრულიად ახალგაზრდა ასაკში ვალის გადახდის უდიდესი ტვირთი აწევთ. აზარტული თამაშით გართულს აღარ აქვს ძალა, რომ იშრომოს, ისწავლოს, ოჯახი შექმნას. ეს პრობლემა ძალიან მრავალმხრივია”, – განაცხადა მამა ანდრია ჯაღმაიძემ.
მისივე თქმით, დღევანდელ შეხვედრაზე საინტერესო მოსაზრებები გამოითქვა.
“თვითონ საკანონმდებლო ინიციატივაში მნიშვნელოვანი რეგულაციებია ნაგულისხმევი. ჩვენი ფორმატი საშუალებას იძლევა, რომ სამთავრობო სექტორის გარდა, საზოგადოების სხვა წარმომადგენლები, რომლებიც ამ საკითხებით არიან დაინტერესებულები და წლების განმავლობაში ამ საკითხებზე მუშაობდნენ, იყვნენ ჩართულები. დღევანდელი დღის რეზიუმე იყო ის, რომ შეიქმნას სამუშაო ჯგუფი, სადაც შევლენ როგორც სახელმწიფოს წარმომადგენლები, ასევე საზოგადოების წევრები და რა თქმა უნდა, ეკლესიაც თავის წვლილს შეიტანს ამაში”, – განაცხადა მამა ანდრია ჯაღმაიძემ.