თურქმა ბიზნესმენმა, რომლის სასტუმროშიც ხანძარი გაჩნდა ბიზნესსაქმიანობა საქართველოში 2011 წლიდან დაიწყო. ეროლ ავგორენის სახელი შპს „მერსინ ტურიზმს“უკავშირდება, რომელიც რეგისტრირებულია ქ. ბათუმში, გორგასალის ქ. №159, ბინა 51 -ში. ტურისტული კომპანია შპს „მერსინ ტურიზმი“თურქეთის სამ მოქალაქეს ეკუთვნის და სამოგზაურო ტურებს აწყობს. აღნიშნულ კომპანიაში ეროლ ავგორენი 80% მფლობელია, ხოლო მეთინ არიფაღაოღლუს 10% ეკუთვნის, კიდევ 10.% ათილგან არიფაღაოღლუს.
ეროლ ავგორენის სახელს უკავშირდება კიდევ ერთი კომპანია ბათუმში – შპს „ოქროს ლომი“, რომელიც თურქმა ბიზნესმენმა 2015 წლის 9 მარტს დაარეგისტრირა.
სამორინეში „ოქროს ლომი“ ეროლ ავგორენი 100-პროცენტიანი წილის მფლობელია, ხოლო კომპანიის დირექტორი თურქეთის მოქალაქე, იასინ ილმაზია. კომპანიას იურიდიულ მისამართად ქ. ბათუმი, შავშეთის ქ., N2/4 აქვს მითითებული.
რაც შეეხება ხუთვარსკვლავიან სასტუმროს – „ლეო გრანდს“, სადაც გუშინ ხანძარი გაჩნდა, ის 2015 წლის ზაფხულში გაიხსნა. როგორც მაშინ მთავრობის ადმინისტრაციის პრესსამსახურის მიერ გავრცელებულ ინფორმაციაში იყო ნათქვამი, სასტუმროში, რომელშიც 40 მილიონი დოლარის ოდენობის ინვესტიცია განხორციელდა და 700 ადამიანი დასაქმდა, არის 180 ნომერი და მსოფლიო კლასის მომსახურება. მაღალი კლასის სასტუმრო კომპლექსში განთავსებულია საპრეზიდენტო აპარტამენტები, საკონფერენციო დარბაზები, რესტორანი, კლუბი და სპაცენტრი.
შს სამინისტროს ინფორმაციით, “ლეო გრანდში” გაჩენილი ხანძრის შედეგად, გარდაცვლილია 11 ადამიანი, მათ შორის, 10 საქართველოს, ხოლო 1 ირანის რესპუბლიკის მოქალაქეა.