კანონი იქნება აბსოლუტურად იგივე პრინციპების მატარებელი სააკაშვილის მიმართ, როგორც იქნება ნებისმიერი პირის მიმართ, – ამის შესახებ პარლამენტის იურიდიულ საკითხთა კომიტეტის თავმჯდომარემ, ეკა ბესელიამ განაცხადა.
“კანონი ამბობს, რომ სამართლებრივი პროცედურები უნდა გაგრძელდეს. ამიტომ, მიმდინარეობს სასამართლო პროცედურა, მიმდინარეობს ქვეყნებს შორის სამართლებრივი თანამშრომლობის ფორმატი. ეს პროცესი მიყავს ერთი მხრივ სასამართლოს ბრალდებების ნაწილში. მეორე პროცესი, რომელიც ეხება სახელმწიფოთაშორის თანამშრომლობას, სამართლებრივ დახმარებას, ექსტრადიციას და სხვა საკითხებს. ჩვენ ვადევნებთ თვალს, რომ ეს პროცესები კანონის შესაბამისად განხორციელდეს. კანონი იქნება აბსოლუტურად იგივე პრინციპების მატარებელი სააკაშვილის მიმართ, როგორც იქნება ნებისმიერი პირის მიმართ, ვის წინააღმდეგაც გაცემულია წინასწარი დაპატიმრების დასკვნა“, – განაცხადა ეკა ბესელიამ.
საქართველოს ყოფილი პრეზიდენტის, მიხეილ სააკაშვილის მტკიცებით, უკრაინის პრეზიდენტმა პეტრო პოროშენკომ სახელმწიფო გადატრიალების მცდელობისთვის მისი დაპატიმრების ბრძანება გასცა.