პოროშენკო და რადა არჩეულები არიან და სააკაშვილმა პოლიტიკური ხმაური მოახერხა, რაც კარგად ეხერხება. ეს იმას არ ნიშნავს, რომ უკრაინაში ხელისუფლება იცვლება, – ამის შესახებ პარლამენტის ვიცე-სპიკერმა ზვიად ძიძიგურმა კიევში განვითარებულ მოვლენებთან დაკავშირებით განაცხადა.
„რატომ უნდა გამოვრიცხო, რომ მიხეილ სააკაშვილი უკრაინაში რუსეთის ინტერესების გამტარებელია, რადგან საქართველოში მისი მმართველობა პირდაპირ რუსული ინტერესი იყო და ცხინვალისა და სოხუმის აღიარება სწორედ მისი ხელისუფლების პირობებში მოხდა, რაზეც რუსეთი ვერც ერთ სხვა მოცემულობაში ვერ იოცნებებდა, მაგრამ რუსეთს ეს საჩუქრად სააკაშვილმა მიართვა.
რაც შეეხება იმ მოვლენებს, რაც უკრაინაში მიმდინარეობს, ეს ყველაფერი ცოტათი გაბუქებულია. უკრაინაში არაფერი ისეთი ხდება და წინასწარ დაანონსებული რევოლუციების საშიშროებაც არ არსებობს. პოროშენკო და რადა არჩეულები არიან და სააკაშვილმა პოლიტიკური ხმაური მოახერხა, რაც კარგად ეხერხება. ეს იმას არ ნიშნავს, რომ უკრაინაში ხელისუფლება იცვლება. არეული და დასუსტებული უკრაინა პირდაპირ რუსეთის ინტერესებში შედის, რომელსაც უკრაინასთან პირდაპირი და არაპირდაპირი ომი აქვს. ვინ რომელი დავალების შემსრულებელია, ამაზე საუბარი რთულია, მაგრამ რატომ უნდა გამოვრიცხო, რომ სააკაშვილის პოლიტიკა უკრაინაში შეიძლება რუსულ ინტერესებს ემსახურებოდეს?“, – განუცხადა პირველ არხს ზვიად ძიძიგურმა.