საზოგადოებას მოვუწოდებ, რომ ნუ აიცრუებენ გულს ვაქცინაციაზე, ვაქცინაცია როგორც ტექნოლოგია არის უსაფრთხო და ეფექტური, იცავს დაავადებებისგან. საქართველოში შემოსული ყველა ვაქცინა არის მაღალი ხარისხის, – ამის შესახებ ჯანდავის მინისტრმა დავით სერგეენკომ საქართველოში ჯანმრთელობისთვის საფრთხის შემცველი 29 222 დოზა ვაქცინის გახარჯვასთან დაკავშირებით აუდიტის სამსახურის მიერ გავრცელებულ ინფორმაციასთან დაკავშირებულ ბრიფინგზე განაცხადა.
მისი თქმით, გავრცელებული ინფორმაცია, რომელიც იმუნიზაციის პროგრამას ეხებოდა და რამდენიმე პქუნტისაგან შედგებოდა, არ შეესაბამება სიმართლეს. ხაზგასმით მინდა აღვნიშნო, რომ მისი არც ერთი პუნქტი არ შეესაბამება სიმართლეს.
„მივყვები პუნქტების მიხედვით, რომ ეს პრობლემა ვაქცინებზე ვრცელდებოდა მთლიანად იმუნიზაციის პროგრამაზე, მათ შორის ბავშვების ვაქცინებზე. ეს მსჯელობა იყო მხოლოდ კონკრეტულ ჯგუფზე, ცოფის საწინააღმდეგო ვაქცინაზე. მეორე – გავრცელებული ინფორმაცია, რომ ამ ვაქცინას არ ჰქონდა ბაზარზე დაშვების უფლება, არ იყო რეგისტრირებული და საერთოდ, არალეგალური იყო და კომისიის გადაწყვეტილებით მოხდა შემოტანა, ესეც არ შეესაბამება სიმართლეს ცალსახად. ეს იყო ჩვეულებრივად რეგისტრირებული 2015 წელს, არა მარტო რეგისტრირებული, არამედ ჯანდაცვის მსოფლიო ორგანიზაციის მიერ პრეკვალიფიცირებული პრეპარატი.
მესამე ის, რომ ეს ვაქცინა პოტენციურად საფრთხეს უქმნიდა ადამიანების ჯანმრთელობას, არც ეს შეესაბამება სიმართლეს. ამასაც განვმარტავ, ჩვეულებრივად ვაქცინის ან რამე სხვა მედიკამენტის რეგისტრაციაში არის რამდენიმე დონე, ერთი არის საკუთრივ რეგისტრაცია და ამაზე უფრო მაღალი დონე არის ჯანდაცვის მსოფლიო ორგანიზაციის მიერ მინიჭებული პრეკვალიფიკაცია, რომელიც არის ხარისხის უფრო მაღალი თამასა“, – განაცხადა დავით სერგეენკომ.
მისი თქმით, სამინისტრო ცდილობს ყველა ვაქცინა, თუკი არსებობს მსოფლიო ბაზარზე, იყოს ჯანდაცვის მსოფლიო ორგანიზაციის მიერ პრეკვალიფიცირებული, თუმცა ყოველთვის ეს არ ხერხდება, მაგრამ თუ პრეკვალიფიკაციას მოხსნის ჯანდაცვის მსოფლიო ორგანიზაცია, არ ნიშნავს, რომ ეს ვაქცინა წარმოადგენს საფრთხეს.
„მე ახლა ცოფის ვაქცინაციაზე ვსაუბრობ და არა – გეგმიურზე, რომელსაც საერთოდ არც კი უნდა შევეხოთ, მაღალი კლასის ვაქცინები არის. შარშან, 11 თებერვალს როგორც კი მოგვივიდა ეს შეტყობინება, ჩვენი მოქმედების ალგორითმი იყო ასეთი – ან უნდა შეგვეწყვიტა ვაქცინაცია, სანამ ახალს არ შემოვიტანდით, ეს დაიჭერდა სადღაც თვენახევარს და ამ ხნის განმნავლობაში უბრალოდ დავკარგავდით ადამიანებს ცოფით გარდაიცვლებოდა რამდენიმე., მეორე -გაგვეგრძელებინა ისევ, ან გვეზრუნა ჩანაცვლებაზე. ჩვენ ვიზრუნეთ ჩანაცვლებაზე, რამაც დაიჭირა 5 კვირა“, – განაცხადა დავით სერგეენკომ.
მინისტრის განცხადებით, 20 მარტიდან იმუნიზაცია უკვე ახალი ვაქცინით გრძელდება. თუმცა, იმ პერიოდში და მანამდე პერიოდში, ამ ვაქცინას არც ერთი გართულება არ ჰქონია.
აუდიტის სამსახურის ცნობით, საქართველოში ჯანმრთელობისთვის საფრთხის შემცველი 29 222 დოზა ვაქცინა გაიხარჯა.