თბილისის ყოფილი მთავარი პროკურორის ნოდარ გრიგალაშვილის განცხადებას, რომ იუსტიციის მინისტრმა თეა წულუკიანმა სულხან მოლაშვილთან გამოძიების დასრულებამდე “მეგობრული შეთანხმება” დაამყარა, არ ეთანხმება მოლაშვილის ადვოკატი და აცხადებს, რომ სულხან მოლაშვილის საქმეზე სახელმწიფოს მხრიდან ყველა დარღვევის აღიარება ჯერ კიდევ წინა ხელისუფლების დროს მოხდა.
“ეს გადაწყვეტილება არის 2014 წლით დათარიღებული, მაგრამ თუ კარგად ჩახედავთ, მეგობრულ შეთანხმებაზე საუბარი დაიწყო ჯერ კიდევ 2010 წლიდან და 2011 წლის მარტში, საჯაროდ ვაცხადებ ამას, რომ არსებობს საქართველოს ხელისუფლების მიმართვა ევროპის სასამართლოსადმი, სადაც ამას ყველაფერს აღიარებს”. განაცხადა ბარათაშვილმა.
ნოდარ გრიგალაშვილის განცხადებაზე, რომელიც ამბობს, რომ 2014 წლის 11 მარტს თეა წულუკიანმა ევროსასამართლოში ანალოგიური შინაარსის წერილი გაგზავნა, ბარათაშვილი აცხადებს, რომ ახალმა ხელისუფლებამ დაადასტურა წინა ხელისუფლების აღიარება და სხვა არაფერი მოუხდენია.
კონტროლის პალატის ყოფილი თავმჯდომარის გახმაურებულ საქმეზე ადვოკატმა და თბილისის მაშინდელმა პროკურორმა გადაცემა “პრიორიტეტში”,ტელეკომპანია “იბერიის” პირდაპირ ეთერში ისაუბრეს.