თითქმის ორ წლიანი ძიების შემდეგ პროკურატურამ ეროსი კიწმარიშვილის საქმეზე ძიება შეწყვიტა. საგამოძიებო უწყებამ საქმეში არსებული მტკიცებულებების ანალიზის საფუძველზე დაადგინა, რომ ეროსი კიწმარიშვილი მიზანმიმართულად თვითმკვლელობამდე არავის არ მიუყვანია და არავის არ მოუკლავს, მან თავი მოიკლა. ამ ვერსიის პროკურატურას არ სჯერა. Aმბები.გე-ს გარდაცვლილის ძმამ ზურა კიწმარიშვილმა ყველა იმ საეჭვო გარემოებაზე ესაუბრა, რომელიც მათი თქმით, ამტკიცებს, რომ “საქმე გვაქვს დანაშაულთან”.
– თავიდანვე ვიცოდით, რომ პროკურატურის ვერსია არასწორი იყო. ვცდილობდით ორი წლის განმავლობაში გამოძიებასთან თანამშრომლობით გვეპოვა მტკიცებულებები, რომელიც ჩვენს ვერსიას დაამტკიცებდა. ეს ძალიან რთული იყო, რადგან გამოძიება ინტერნსიურად მოქმედებდა პირველი ვერსიის დამამტკიცებელი ინფორმაციის მოსაპოვებლად. უამრავი ექსპერტიზა ჩატარდა, უამრავი ადამიანი დაიკითხა, მაგრამ გამოძიების ქმედებები იყო ძირითადად ვალების და იმ ფაქტის გარშემო, რომ იქ დანაშაულის კვალი არ იყო. გამოძიება ნაკლებ ინტერესს იჩენდა იმ ფაქტების მიმართ, რომელიც მათ ვერსიას საეჭვოს ხდიდა. ყველგან არის საკამათო გამოძიებასთან, უამრავი ნიუანსია. შეგვიძლია დეტალურად ვისაუბროთ ამ ყველაფერზე. პირველი წუთიდან არ გვჯეროდა ამ ვერსიის, რადგან ვიცნობდით ამ ადამიანს, ვიცოდით მისი იმ დროინდელი გეგმებისა და აქტიუროებების შესახებ.
შემთხვევის ადგილი მიუთითებდა, რომ იქ იყო უცნაური გარემოებები, რომელიც ეჭვქვეშ აყენებდა თვითმკვლელობის ვერსიას. ისეთი მდგომარეობა იყო ავტომობილში, რასაც ახნა ვერ მოვუძებნეთ, თუნდაც ჩამოწეული სამზეური, რომელიც ჩვენი აზრით, ჩამოწეული იქნა იმის გამო, რომ სუსტი განათების პირობებში გასისხლიანებული ადამიანის სახე დაემალათ. ფანჯრები იყო ჩამოწეული, რისი საჭიროებაც გაურკვეველია. გარდაცვლილს ეცვა კოსტიუმი, გადაჭერილი ჰქონდა ღვედი… ბევრი საეჭვო ფაქტი დაფიქსირდა. ადგილზე ამღებული იქნა მასრა და ყუთი რომელშიც 50 ტყვია იდო ყიდვის მომენტში. შემდგომში დადასტურდა, რომ იქიდან 1 ტყვია დაკარგული იყო. გამოძიებამ არ იცის ეს ტყვია, სად შეიძლებოდა გამქრალიყო. ის გარემოება, რომ ჩატარდა ექსპერტიზა, რომლმაც თითქოს დაადასტურა, რომ მანქანაში ეროსის გარდა არავინ იჯდა და რომელიც პროკურატურამ მთავარ მტკიცებულებად გამოიყენა, არის უსაგნო. თავისუფალ მდგომარეობაში იქ ვინმე პირის ყოფნა გამორიცხული არ იყო.
ეროსი კიწმარიშვილის პირადი კომპიუტერი
– მისი პირდაი კომპიუტერი ამოღებული იქნა 21-22 ივლისს, ანუ ეროსის დაკრძალვის მეორე დღეს. მაშინ პანაშვიდის დღეებში ვთხოვეთ გამოძიებას, არ მოეხდინა ამოღების პროცესში. ავიღეთ პასუხისმგებლობა, რომ ეს ნივთები დაცულ ოთახში იქნებოდა. 2015 წლის იანვარში გადაწყდა, რომ უნდა მოგვეხდინა შემოწმება. უნდა გაგვეტეხა მისი პირადი ექაუნთი და ინფორმაცია გვენახა. როდესაც დავიწყეთ ეს პროცესი, აღოჩნდა, რომ მისი ექაუნთი გატეხილი იყო. გამოძიებამ დაადგინა ამ პირის ვინაობა, ვინც ეს ჩაიდინა, თუმცა მის შესახებ ჩვენ ძალია მცირე ინფორმაცია გვქონდა. გვითხრეს, რომ ეს ადამიანი იყო ახალგაზრდა მამაკაცი, ტიპიური ჰაკერი, რომელიც მატერიალური სარგებელის მოტივით ახდენდა ცნობილი ადამიანების ინტერნეტსივრცეში შეღწევას. თუმცა არის ერთი საეჭვო დამთხვევა – გამოძიება 3 იანვარს გავაფრთხილეთ, რომ კომპიუტერების შემოწმება უნდა მომხდარიყო, 8-ში ეროსის პირადი ექაუნთი გატეხეს. საინტერესოა დაცვის თანამშრომლის ჩვენება. ეს ადამიანი ამბობდა, რომ შემთხვევის დღეს შენობის გარეთ იმყოფებოდა, რადგან არ ჰქონდა კონდინციონერი. (იმ დღეს ძალიან ცხელოდა). ვიდეომასალაში გამოჩნდა, რომ ეროსის სარდაფში ჩასვლის დროს ეს ადამიანი შესულია სამორიგეო ოთახში. გამომძიებლებს მოვახსენეთ, რომ ეს საეჭვოდ გვეჩვენა, თუმცა თქვეს, რომ ამ ადამიანის მიმართ ინტერესი არ გააჩნდათ.
რაც შეეხება კომპიუტერების დათვალიერებას, ვნახეთ, რომ სკაიპში ერთი კვირით ადრე ინფორმაცია არ არსებობდა, არც “ფეისბუქზე”. ანუ ბოლო ერთი კვირა არაფერი აღარ იყო შენახული. პროკურატურაში თქვეს, რომ მათ თითქო იპოვეს მესიჯი, სადაც ეროსი მეგობარს მისი პრობლემების შესახებ წერდა. უცნაურად გვეჩვენა ეს სიახლე, რადგან ასეთი მესიჯი დათვალიერების მომენტში არ გვინახავს და დათვალიერებას ჩვენ ერთად ვახდენდით.
ავტომობილის მდებარეობა
– საეჭვო იყო ასევე მანქანის მდგომარეობა. ჩვენი რწმენით ავტომობილი სხვა ადგილას იდგა, როდესაც სასიკვდილო გასროლა მოხდა. მანქანის მარცხენა მხარეს წინა და უკანა მინები ბოლომდე ჩამოშვებულია და სწორედ ამ მიმართულებით მოხდა გასრულა ანუ ამ მიმართულებით გავრცელდა სისხლის წვეთები და ნაწილაკები. მის მიმდებარედ ეფექტური ქიმიური საშუალებებით მოვახდინეთ დათვალიერება და იქ ასეთი ნაწილაკები არ აღმოჩნდა. აქედან გამომდინარე, ან საერთოდ არ გავრცელდა სისხლი, რაც გამორიცხულია, ან მანქანა იდგა სხვა ადგილას.
იარაღის სასხლეტზე აღმოჩენილი ორი დნმ-ის კვალი
– ეს არის ერთ-ერთი ყველაზე მნიშვნელოვანი ფაქტი, რომლითაც ჩვენ დანაშაულის ნიშნებზე ვაპელირებდით. იარაღის სასხლეტზე სავარაუდოდ ეროსის და უცხო პირის დნმ-ი იყო. გამოძიებამ მიმართა ღონისძიებებს. ამოღებული იქნა დნმ-ის ნიმუშები იმ ადამიანებისგან, ვისაც შეიძლება იარაღთან შეხება ჰქონოდათ, ესენი იყვნენ მოწმეები, რომლებიც კრიმინალისტებს ადგილზე დახვდნენ, მაღაზია “დიანას” თანამშრომლები და კრიმინალისტები, ვინც საზღვარზე შემოტანის დროს იარაღი ჩაიბარეს. არც ერთი მათგანის დნმ-ს ეს დნმ-ი არ დაემთხვა. ის დარჩა უცხო პირის დნმ-ად.
ჩეჩენი გარეგნობის მამაკაცი
– ეს ადამიანი ისეთი ყურადღების მიმქცევი იყო, რომ ვიფიქრეთ, კარგი იქნებოდა მისი იდენტიფიცირება. შესაძლებელია ის არ იყო შემსრულებელი და უშუალოდ გასროლის მომენტში იქ არ იმყოფებოდა, მაგრამ თუ იქ რამდენიმე ადამიანი მუშაობდა, ერთი ადამიანი შეიძლება დანაშაულის ჩადენამდე გასულიყო ტერიტორიიდან. გამოძიებამ ვერ გაარკვია ვინ იყო ეს ადამიანი. შემდეგ ჩვენ ამ პირის გადაადგილების ამსახველი ვიდეოკადრები სამხედრო მომზადება გავლილ ადამიანებს ვაჩვენეთ. მათ თქვეს რომ ეს დიდი ალბათობით სპეცრაზმელია. ის ადამიანი ვერსაც ვიპოვეთ არათუ ჩვენ, არამედ გამომძეიებლებმაც. საეჭვოდ რჩება ეს ყველაფერი.
ფინანსური პრობლემები
– იმ პერიოდში სართიჭალაში ვიყავი გადასული ოჯახით. პირადი შეხება მასთან არ მქონდა. ბოლოს ახლობლის გასვენებაში შევხვდით ერთმანეთს, ბევრ საკითხზე ვისაუბრეთ, მათ შორის მიმდინარე ვალზე. თქვა, რომ არანაირი დრამატიზმი ამაში არ ყოფილა და “არის ამის წყარო და გადავიხდი მალეო”. ბევრ ადამიანთან საუბრობდა სამომავლო გეგმებზე, არც ერთ მათგანთან არ გამოუვლენია უიმედობისა თუ ღრმა დეპრესიის განცდა. რაც შეეხება იარაღის ყიდვის ფაქტს – 8 ივლისს ჩვენი ნათესავის დაკრძალვაზე იყო და მეგობართან საუბრობდა, რომ მას სჭირდებოდა იარაღი და ტყვიები. ამ ყველაფერს ვუკავშირებ იმ საქმეებს, რასაც ის მაშინ აწარმოებდა და გეგმავდა. ამბობდა, რომ
ვიღაც პიროვნებებს ტესტავდა და მათი მხრიდან რეაქციას ელოდებოდა. ამის იქით რა იყო არ ვიცი. ვვარაუდობ, რომ შესაძლოა მას ძალადობისა და თავდასხმის მოლოდინი ჰქონდა. გარდაცვალებამდე ორი დღით ადრე ესაუბრა შვილსაც, რომელიც იმ დროს ამერიკაში ცხოვრობდა და ერთ-ერთ კომპანიაში სამქიანობის შესახებ ეკითხებოდა. ეროსი დეტალურად უხსნიდა, რა და როგორ სჯობია. ძალიან მშვიდად, ზედმეტი სენტიმენტების გარეშე.