22 წლის ანანო ვეკუა სამხრეთ აფრიკაში ერთ-ერთ უმსხვილეს მეღვინეობაში სამუშაოდ მიიწვიეს.
ანანომ მეღვინეობა აგრარულ უნივერსიტეტში შეისწავლა. მეღვინე ოჯახში არავინ ჰყოლია, ღვინის კულტურა უნივერსიტეტში აითვისა, შემდეგ კი ამ მიმართულებით საქმიანობა უფრო ინტენსიურად, კორპორაცია “ქართულ ღვინოსთან” ერთად განაგრძო. როგორ მოხვდა 22 წლის ქართველი გოგო სამხრეთ აფრიკაში ამის შესახებ “მარკეტერი” წერს.
“არსებობს პროექტი, რომელსაც საქართველოს საელჩო სამხრეთ აფრიკაში, საქართველოს საკონსულო სამხრეთ აფრიკაში, ღვინის ეროვნული სააგენტო და სამხრეთ აფრიკა-საქართველოს სავაჭრო პალატა ახორციელებენ, რომელიც რთველის სეზონზე ამ ორი ქვეყნის ღვინის კომპანიებს შორის თანამშრომლების გაცვლას უწევს ორგანიზებას.
კომპანიაში ცდილობენ ყველა პროცესში ჩამრთონ: ყურძნის მიღება, მაცერაცია, ალკოჰოლური დუღილის დაწყება და წარმართვა, ფერმენტაციის პროცესის მუდმივი კონტროლი და ა.შ, პარალელურად, ღვინის დამუშავება, ფილტრაცია, მოკლედ, საწარმოში საქმე სულ არის და დამხმარეც სულ საჭიროა.
პირველად საწარმოს მასშტაბმა გამაოცა, მანამდე ამხელა მეღვინეობა არასდროს მქონდა ნანახი, ძალიან მოწესრიგებული და მოვლილი ვენახები აქვთ, ძალიან ორგანიზებულები არიან საწარმოშიც საქმესთან მიმართებით. კარგად არის კომპანიაში პასუხისმგებლობები გადანაწილებული და ყველა თანამშრომელმა ზუსტად იცის თუ რა არის მისი მოვალეობა და უფლება. ტექნოლოგიის კუთხით მცირე, მაგრამ საინტერესო განსხვავებული დეტალები აღმოვაჩინე, რომლებსაც ქართულ ჯიშებზეც ვცდი აუცილებლად.”- ამბობს ანანო ვეკუა “მარკეტერთან” ინტერვიუში.