ემუქრება თუ არა უვიზო მიმოსვლას საფრთხე – რა განმარტებას აკეთებს “სიდას“ იურისტი

„სამოქალაქო განვითარების სააგენტოს“ იურისტი თეონა კილაძე აცხადებს, რომ ამ ეტაპზე, საქართველოსთვის ვიზალიბერალიზაციის შეჩერების საფრთხე არ არსებობს. როგორც მან მედიაჰოლდინგ „კვირას“ პრესკლუბში გამართულ პრესკონფერენციაზე განაცხადა, მოლოდინები, რომ ცალკეული მოქალაქეები უვიზო მიმოსვლის წესებს დაარღვევდნენ, ისეც იყო.
თუმცა, სიდას იურისტი არ გამორიცხავს, რომ იმ შემთხვევაში, თუ საქართველოს მოქალაქეების მხრიდან უვიზო მიმოსვლის დარღვევის შემთხვევები მასობრივ ხასიათს მიიღებს, შეჩერების მექანიზმის ამოქმედების საკითხი დღის წესრიგში დადგება.
„ამ ეტაპზე ვერ ვიტყვით, რომ ვიზალიბერალიზაციას საფრთხე ემუქრება, მოლოდინები, რომ ცალკეული მოქალაქეები უვიზო მიმოსვლის წესებს დაარღვევდნენ, ისეც იყო, მაგრამ თუ მასიურ სახეს მიიღებს საქართველოს მოქალაქეების მხრიდან დარღვევების ფაქტები, რა თქმა უნდა, შესაძლოა, ამაზე იმსჯელოს ევროკავშირმა. თუ კი ერთმა ქვეყანამ მაინც თქვა, რომ მას აღარ სურს საქართველოსთან უვიზო მიმოსვლა, ევროკავშირი ვალდებულია, ეს საკითხი განიხილოს“, – განაცხადა თეონა კილაძემ.
მან, ბოლო დროს გერმანიიდან საქართველოს მოქალაქეების დეპორტაციის ფაქტზეც გააკეთა კომენტარი და განმარტა, რომ გერმანია, უმეტეს შემთხვევაში, უარს ეუბნება თავშესაფრის მაძიებლებს.
„გერმანიაში თავშესაფრის მიღების მსურველთა მიმართვიანობა არის უფრო მაღალი, ვიდრე სხვა ქვეყნებში და გერმანიამ გამოიჩინა უფრო მეტი სიმკაცრე თავშესაფრის მაძიებლების მიმართ. უარი სხვადასხვა ფაქტორითაა განპირობებული. თავშესაფრის მიღების მსურველებს უნდა ჰქონდეთ კონკრეტული, რეალური მიზეზი, რითიც დაასაბუთებენ, რომ საქართველოდან იდევნებიან. ადრე ამბობდნენ, რომ მკურნალობის საბაბით მიმართავდნენ და იყო მთელი რიგი დაავადებები, რომელთა მკურნალობაც საქართველოში შესაძლებელი არ იყო, ან ძალიან დიდ თანხებს უკავშირდებოდა. ძირითადად ეს ეხებოდა c ჰეპატიტს, თუმცა ჯანდაცვის რეფორმის შემდეგ, ეს პრობლემა მოიხსნა, შესაბამისად, ამ მოტივის დასახელება თანხმობის საფუძველი ვეღარ ხდება, არის მხოლოდ გამონაკლისი შემთხვევები, როდესაც გადაუდებელი საჭიროების მქონდე ადამიანს აძლევენ დროებით ბინადრობის ნებართვას მის განკურნებამდე, თუმცა, გამოჯანმრთელების შემდეგ, მას მისდის ოფიციალური წერილი, რომ ნებაყოფლობით დატოვოს ქვეყანა, წინააღმდეგ შემთხვევაში, საქმე იქნება გამოძიებული. ასევე იყო შემთხვევები, როდესაც მოქალქეები ამბობდნენ, რომ საქართველოდან დევნიდნენ და ქმნიდნენ გარკვეულ დოკუმენტებს, თუმცა საქართველო ძალიან ბევრი ქვეყნისთვის არის უსაფრთხო ქვეყნების სიაში შესული. კიდევ ერთხელ აღვნიშნავ, უვიზო მიმოსვლის შემდეგ, რასაკვირველია, თავშესაფრის მაძიებელთა რიცხვი გაიზარდა და ეს მოლოდინი იყო, რადგან ადამიანებს ჰქონდათ მოლოდინი, რომ თავშესაფრის მოთხოვნა გაუმარტივდებოდათ, თუმცა უვიზო მიმოსვლის ამოქმედებას, სწორედ ის დაედო საფუძვლად, რომ გამარტივებულიყო მიმოსვლა, მაგრამ მხოლოდ ტურისტული, სასწავლო ან ახლობლების მონახულების მიზნით“, – განაცხადა თეონა კილაძემ.
„სამოქალაქო განვითარების სააგენტოს“ იურისტი აცხადებს, რომ ვიზალიბერალიზაციის ამოქმედების შემდეგ, დეპორტაციის პროცედურებიც გამარტივდა.
„უვიზო მიმოსვლის ამოქმედებამდე, როდესაც ევროკავშირის ერთ ქვეყანას მიმართავდა პირი თავშესაფრის მიღების მოთხოვნით და ეს კონკრეტული ქვეყანა ეუბნებოდა უარს, მას გასაჩივრების უფლება ჰქონდა და აქედან გამომდინარე, მისი ქვეყანაში ყოფნა ხანგრძლივდებოდა. დღეს ასე აღარ ხდება – როდესაც მოქალაქეს მისდის უარი, მას აქვს ერთი კვირა ქვეყნის დასატოვებლად და თუ ნებაყოფლობით არ დატოვებს, მისი გამოძევება ხდება. ამასთან, ევროკავშირს აქვს ერთიანი ბაზა და მაგალითად, თუკი გერმანიაში პირს ეთქვა უარი თავშესაფრის მიღებაზე, ის ვერცერთ სხვა ქვეყანაში ვეღარ მოითხოვს თავშესაფარს. საბუთების განხილვაც ძალიან შემჭიდროვებულია ვადებში და ხშირ შემთხვევაში რამდენიმე დღეზეა საუბარი“, -აღნიშნა თეონა კილაძემ.
სიდას იურისტმა, უვიზო მიმოსვლის შესახებ, საინფორმაციო კამპანიის მნიშვნელობაზეც ისაუბრა.
მისი თქმით, საქართველოს ხელისუფლებამ აღნიშნული კამპანიები ჩაატარა, თუმცა, კილაძის რეკომენდაციაა, რომ მსგავსი სახის კამპანია მომავალშიც, მთელი ქვეყნის მასშტაბით გაგრძელდეს.
„აუცილებელია, რომ უვიზო მიმოსვლის წესების შესახებ, ინფორმაციას ფლობდეს საქართველოს ყველა მოქალაქე, ასეთ დროს დიდი ქალაქებში უფრო მარტივია მოსახლეობისთვის ხმის მიწვდენა, მაგრამ არის რეგიონები, სადაც ნაკლები ინფორმაციაა. შესაბამისად, ამ პროცესში დიდი როლი აქვს ადგილობრივ თვითმმართველობას, ასევე, საჭიროა შესაბამისი უწყებების ჩართულობაც“, -აღნიშნა თეონა კილაძემ.