დიმიტრი ხუნდაძე დავით ქევხიშვილს – ჭკვიანი კაცი გუნდის გარეთ არასოდეს თამაშობს

საპარლამენტო უმრავლესობის წევრი დიმიტრი ხუნდაძე ქართველ ძიუდოისტთა საპროტესტო აქციას ეხმაურება და აცხადებს, რომ ღიად გასაჯაროებული ფაქტები სათანადო დონეზე უნდა იყოს შესწავლილი და არა „ოჯახში დაიმალოს“.
„უკვე მერამდენე დღეა ქართველ ძიუდოისტთა მოთხოვნებს ვისმენთ. მათ გაასაჯაროეს ისეთი ფაქტები, რომელმაც შოკში ჩაგვაგდო ყველა. ველოდი, რომ უმალვე დაიწყებოდა ამ ფაქტების შესწავლა. დღეს კი, ამ სახელოვანი ბიჭებისგან კიდევ ერთი საპროტესტო აქცია მივიღეთ. როგორც ჩანს, საპროტესტო აქციები თანდათან უფრო მწვავე ფორმას იღებს, რაც ჩვენთვის არასასიამოვნოა. 
საყურადღებო იყო დღეს პარლამენტის სპორტისა და ახალგაზრდულ საქმეთა კომიტეტის თავმჯდომარის პირველი მოადგილის, შოთა ხაბარელისა და საქართველოს ოლიმპიური კომიტეტის თავმჯდომარის ლერი ხაბელოვის განცხადებები, რითაც პროცესები ჩიხში შევიდა და კითხვებზე პასუხი არ არსებობს. ვფიქრობ, ძიუდოისტების მიერ საჯაროდ გაცხადებულ ასეთ ფაქტებზე არა ოჯახის შიგნით უნდა იმსჯელონ, არამედ სათანადო დონეზე უნდა იყოს შესწავლილი. სხვაგვარად ჩვენ, როგორც ხელისუფალნი არ ვიქნებით სამართლიანნი საზოგადოების წინაშე. ვიმედოვნებ, სწორედ ამ გზით წავა პროცესები და სიმართლე დადგინდება. თუმცა, ძნელად მეგულება ადამიანი, ვინც დღეს ამ ბიჭების გულწრფელობაში ეჭვს შეიტანს. 
რაც შეეხება ძიუდოს ფედრაციის პრეზიდენტის დავით ქევხიშვილის გადადგომას, როდესაც საკუთარი გუნდი, რომელიც საქართველოს სახელს ყოველთვის ღირსეულად წარმოაჩენს, ღიად დაგიპირისპირდება, სხვა არაფერი დაგრჩენია, რომ წახვიდე. ჭკვიანი კაცი გუნდის გარეთ არასოდეს თამაშობს“, – განაცხადა დიმიტრი ხუნდაძემ.
დიმიტრი ხუნდაძის პოზიციას აღნიშნულთან დაკავშირებით საქართველოს პარლამენტის პრესსამსახური ავრცელებს.