მიხეილ სააკაშვილმა დეპუტატ ვალერი გელაშვილის ცემის საქმეზე ადვოკატი აიცილა. აღნიშნული განცხადება ადვოკატმა გიორგი ჩივიაშვილმა დღევანდელ სასამართლო სხდომაზე გააკეთა, რომელზეც მას დასკვნითი სიტყვა უნდა ეთქვა. ადვოკატის განმარტებით, მიხეილ სააკაშვილთან კონსულტაციის შემდეგ, მან დაქირავებულ ადვოკატზე უარი განაცხადა.
“მის მიმართ ხორციელდება პოლიტიკული დევნა და ამას მოწმობს არაერთი ადგილობრივი თუ საერთაშორისო ორგანიზაციის დასკვნები. ასევე, ვიცით სტრასბურგის სასამართლოს გადაწყვეტილება ვანო მერაბიშვილის საქმეზე, რომ მისი საკნიდან გაყვანა მოხდა სწორედ ყოფილი პრეზიდენტის წინააღმდეგ ინფორმაციის გამოძალვის მიზნით. ეს ყველაფერი სააკაშვილს აძლევს საფუძველს, რომ ბოიკოტს უცხადებს სასამართლოს, უარს ამბობს დაქირავებულ ადვოკატზე და შესაბამისად, მე მის ინტერესებს ვეღარ დავიცავ”, – განაცხადა გიორგი ჩივიაშვილმა.
თავის მხრივ, პროკურორმა აღნიშნა, რომ დაცვის მხარის ეს ნაბიჯი ემსახურება სასამართლო პროცესების გაჭიანურებას.
შეგახსენებთ, რომ საქართველოს პარლამენტის წევრ ვალერი გელაშვილზე 2005 წელს მომხდარი შეიარაღებული თავდასხმის და მისი ცემის საქმეზე, საქართველოს ყოფილ პრეზიდენტს მიხეილ სააკაშვილს, ძალადობით სამსახურებრივი უფლებამოსილების გადამეტება და ჯანმრთელობის განზრახ მძიმე დაზიანების ორგანიზება ედება ბრალად. მასთან ერთად ამავე საქმეზე პასუხისგებაში შინაგან საქმეთა ყოფილი მინისტრი ივანე მერაბიშვილი, სპეციალური ოპერატიული დეპარტამენტის ყოფილი უფროსი ერეკლე კოდუას და ამავე დეპარტამენტის სამმართველოს ყოფილი უფროსი გია სირაძე მიეცნენ. აღნიშნულ საქმეზე მერაბიშვილის, კოდუასა და სირაძის მიმართ გამამტყუნებელი განაჩენებია დამდგარი. კერძოდ, ივანე მერაბიშვილს საქალაქო სასამართლომ 6 წლითა და 9 თვით, ერეკლე კოდუასა და გია სირაძეს კი 9 წლით თავისუფლების აღკვეთა აქვთ შეფარდებული.