თბილისში განვითარებულ მოვლენებს და მოკლული მოზარდის მამის მხარდასაჭერად გამართულ საპროტესტო აქციას იუსტიციის მინისტრი თეა წულუკიანი გამოეხმაურა. მინისტრმა აღნიშნულ თემაზე პირველი არხის გადაცემაში „აქტუალური თემა მაკა ცინცაძესთან ერთად“ ისაუბრა
„სამწუხაროდ, დღეს ვიხილეთ, რომ ყველა პოტენციური საპრეზიდენტო კანდიდატი ცდილობდა, იმ რაშს მოხტომოდა, რომელსაც ეს საქმე ჰქვია, მაგრამ პრობლემა ისაა, რომ ეს რაში არ არის. ეს სისხლის სამართლის საზარელი საქმეა. ეს ბავშვთა შორის მკვლელობაა და რეალურად, ვისაც არ დაეზარა, ამ ბავშვების ციხეში ჩაყრას ითხოვდა“- განაცხადა წულუკიანმა.
იუსტიციის მინისტრის თქმით, საქართველოს ყოფილმა პრეზიდენტმა მიხეილ სააკაშვილმა თქვა, რომ პროკურატურის ყოფილი მაღალჩინოსნის მირზა სუბელიანის შვილმა მკვლელობა ჩაიდინა, თუმცა როგორც მინისტრი აცხადებს ამის არანაირი მტკიცებულება არ არსებობს.
„შესაძლოა, მომავალში იყოს, მაგრამ დღეს არ არსებობს. სააკაშვილის განცხადებას კარგად უნდა მოსმენა. მის მოსასმენად ბევრი დრო არ მქონდა, მაგრამ მე რომ სუბელიანის ბავშვი ვიყო, სააკაშვილს ვუჩივლებდი და ალბათ, ეს პირველი შემთხვევა იქნებოდა, როცა პრეზუმფციის დარღვევაზე ბავშვი ყოფილ პრეზიდენტს უჩივის.“ – განაცხადა წულუკიანმა.
იუსტიციის მინისტრმა იმ ბავშვის მშობლებს მიმართა, რომლებსაც აღნიშნულ საქმეზე ინფორმაცია გააჩნიათ, რომ საკუთარ შვილებთან იმუშაონ, რათა ყველამ სიმართლე თქვას.
„თუ ეს ბავშვები სიმართლეს არ იტყვიან, გამოძიება ძალიან ბევრი წლის განმავლობაში ჩიხში იქნება.“ – განაცხადა წულუკიანმა.