საპარლამენტო უმრავლესობის ლიდერი არჩილ თალაკვაძე მიიჩნევს, რომ “ოთხოზორია-ტატუნაშვილის” სიის დანიშნულებაა, დანაშაულის ჩამდენმა პირებმა დაინახონ, რომ ადამიანის სიცოცხლისა და ჯანმრთელობის ხელყოფა დაუსჯელი არ დარჩება. მისივე თქმით, ამ სიაში განსაკუთრებით მძიმე დანაშაულებში ბრალდებული ან მსჯავრდებული პირები არიან შეყვანილი.
„სიაში არიან ადამიანები, რომელთაც კონკრეტულ დანაშაულებში მიუძღვით ბრალი და სიას არავითარი კავშირი არ აქვს აფხაზეთსა და ცხინვალში მცხოვრებ საზოგადოებასთან, ოჯახებთან და იმ დიალოგთან, რომელიც ქართველებს აფხაზ და ოს ძმებთან აქვთ.
აღნიშნული სიის დანიშნულებაა, დანაშაულის ჩამდენმა პირებმა დაინახონ, რომ ადამიანის სიცოცხლისა და ჯანმრთელობის ხელყოფა დაუსჯელი არ დარჩება. რაც შეეხება მათი მხრიდან ე.წ. სიის მომზადებას, „ოთხოზორია-ტატუნაშვილის სიას“ ის მნიშვნელობა აქვს, რომ მისი კომუნიცირება მოხდება ამერიკის შეერთებულ შტატებთან, ევროკავშირთან და საერთაშორისო თანამეგობრობასთან, რის შემდეგაც, სავარაუდოდ, ამ ადამიანებზე დაწესდება შეზღუდვები, როგორც გადაადგილების, ისევე ფინანსური ტრანზაქციების თვალსაზრისით“, – განაცხადა საპარლამენტო უმრავლესობის ლიდერმა.
მისი თქმით, ამოცანა მხოლოდ სიის შედგენა არ ყოფილა და არანაკლებ მნიშვნელოვანია, საერთაშორისო მასშტაბით აღნიშნული დოკუმენტის რეალური აღსრულება.
„ყველაფერს გავაკეთებთ, რომ „ოთხოზორია-ტატუნაშვილის სიის“ შემთხვევაში ასე მოხდეს. საოკუპაციო რეჟიმს კი, ალბათ მოუწევს, საზოგადოება დაარწმუნოს, რის გაკეთებას აპირებს და რამდენად საფუძვლიანია მათი ინიციატივა. ოფიციალურ ფორმატებში, სადაც მსგავსი მიმდინარე საკითხები განიხილება, ინფორმაციის გაცვლის რეჟიმი გვაქვს. თუ მათ კონკრეტული დანაშაულის შესახებ მტკიცებულებები და ინფორმაცია აქვთ, ამის გაზიარება შესაძლებელია”, – ამბობს თალაკვაძე.
დადგენილების პროექტი – „ოთხოზორია-ტატუნაშვილის სიის“ შესახებ საქართველოს მთავრობამ 26 ივნისს დაამტკიცა და პარლამენტს გადაუგზავნა. სიაში ამ ეტაპზე 33 პირია შეყვანილი. დოკუმენტის აღსრულებაზე პასუხისმგებელი უწყებები იუსტიციისა და საგარეო საქმეთა სამინისტროები არიან.
მედიაში გავრცელებული ინფორმაციით, ამის საპასუხოდ, ოკუპირებული ცხინვალი ე.წ. სანაკოევის სიის შექმნას გეგმავს.