დავით ზალკანიანი არჩილ გეგეშიძეზე – უახლოეს დღეებში გვექნება მასთან გასაუბრების საშუალება

საგარეო საქმეთა სამინისტრო განმარტებას არ აკეთებს, რატომ არ ესწრებოდა აშშ-ში საქართველოს ელჩი არჩილ გეგეშიძე ამერიკის შეერთებული შტატების სახელმწიფო მდივნის, ჯონ ქერის ვიზიტის ფარგლებში თბილისში გამართულ შეხვედრებს.
საგარეო საქმეთა მინისტრის მოადგილე დავით ზალკალიანმა ამ საკითხთან დაკავშირებით მიმართეს, თუმცა მან შეკითხვა უპასუხოდ დატოვა და აღნიშნა, რომ ელჩის მიერ გაკეთებულ განცხადებასთან დაკავშირებით ახსნა-განმარტებას პირადად მისგან მოისმენენ.
”ჩვენ ვართ ჩართული ძალიან მნიშვნელოვანი ვიზიტის მიმდინარეობაში, ამიტომ დღეს ჩვენ არ გვქონია შესაძლებლობა, რომ გვესაუბრა ელჩთან. ბუნებრივია, უახლოეს დღეებში გვექნება მასთან გასაუბრების საშუალება. ჩვენც გვაინტერესებს, რამდენად შეესაბამება რეალობას ის განცხადებები, რომლებიც გაჟღერდა“, – განაცხადა დავით ზალკალიანმა.
მისივე თქმით, საგარეო უწყებას არჩილ გეგეშიძის განცხადებაზე ექნება შესაბამისი რეაგირება, თუმცა დღეს გაუჭირდება საუბარი, რა იქნება ეს რეაგირება. საგარეო საქმეთა სამინისტრომ აშშ-ში საქართველოს ელჩი არჩილ გეგეშიძე მის მიერ გაკეთებული განცხადების გამო თბილისში გამოიძახა. იგი თბილისში გამთენიისას ჩამოვიდა, თუმცა აეროპორტში ჟურნალისტებთან კომენტარის გაკეთება არ ისურვა.
„საგარეო საქმეთა სამინისტროში უნდა განვიხილოთ ეს თემები და ამის შემდეგ გაჟღერდება ყველაფერი, რაც თქვენ გაინტერესებთ”, – განუცხადა არჩილ გეგეშიძემ ჟურნალისტებს.
აშშ-ში საქართველოს ელჩმა რამდენიმე დღის წინ განაცხადა, რომ პრორუსული ძალები მმართველ გუნდში არიან, მაგრამ გადაწყვეტილების მიღების პროცესზე არ მოქმედებენ.
აღნიშნულ განცხადებას გუშინ საქართველოს პრეზიდენტმა ”არაკვალიფიციური ელჩის არაკომპეტენტური განცხადება” უწოდა.