ვიხსენებთ პატრიარქის გარდაცვალებასთან დაკავშირებულ მოვლენებს, იმ ზღვა ადამიანს, რომელიც უზარმაზარ ტერიტორიაზე იყო. დაკრძალვაზე მილიონ-ნახევარზე მეტი ადამიანი მოვიდა, – ამის შესახებ ბელგიისა და ჰოლანდიის ეპისკოპოსმა, მეუფე დოსითეოსმა საქართველოს პირველ არხს განუცხადა.
მისი თქმით, მომავალმა პატრიარქმა, ხალხის სიყვარულს უნდა უპასუხოს.
„მომავალმა პატრიარქმა, პირველ რიგში, უნდა უპასუხოს ამ სიყვარულს, ხალხის ამ სიყვარულს უნდა უპასუხოს. მეორე, თანამედროვე სიტუაცია რაღაც ახალ მიდგომებსაც გულისხმობს, ვართ ახალი გამოწვევების წინაშე და ბევრი მნიშვნელოვანი საკითხია. ჩემთვის ძალიან მნიშვნელოვანია საეკლესიო სასამართლოს საკითხი. ბევრი ისეთი საკითხია, რომელიც ეკლესიაში დებულებით არსებობს, მაგრამ არ გვაქვს პროტოკოლი“, – განაცხადა მეუფე დოსითეოსმა.
რაც შეეხება პატრიარქობის კანდიდატის ასაკთან დაკავშირებულ მსჯელობას, ეპისკოპოსი ამბობს, რომ ეპისკოპოსებს შორის თუ არსებობს დებულების განსხვავებული ინტერპრეტაცია, საკითხი კენჭისყრაზე უნდა დადგეს.
„საზოგადოებამ იცის, რაც წერია დებულებაში. არის ინტერპრეტირების საკითხი, ეს ძალიან რთული საკითხია. თუმცა, ჩემთვის განსაზღვრულია ის, რაც დებულებაში წერია. ეპისკოპოსებს შორის თუ განსხვავებული ინტერპრეტაციაა, საკითხი კენჭისყრაზე უნდა დადგეს და სინოდი ამას გადაწყვეტს. არ მგონია, პროცესი დაძაბულობით წარიმართოს. განსხვავებული მოსაზრებები არ არის დაძაბულობა. დაძაბულობა სულ სხვა რამეა. ზოგჯერ ადამიანები შეიძლება, ფიქრობენ, რომ კამათი დაძაბულობას გულისხმობს. არ მგონია, ამაზე დიდი კამათი გაიმართოს. მოსაზრებების გამოთქმა, არგუმენტირება იქნება. არ ვფიქრობ, რომ სინოდს დაძაბულობა უნდა მოჰყვეს. უწმინდესის პატივისცემიდანაც ამოვდივარ. მეორე მხრივ, ყველა აცნობიერებს ამ მომენტს, ახლა ჩვენ უნდა ვაჩვენოთ, ჩვენი საზოგადოების წინაშე უნდა წარმოვჩინდეთ, ისე როგორც საჭიროა. ამის რესურსი არსებობს. ეს ყველაფერი მშვიდობით და სიკეთით წარიმართება“, – განაცხადა მეუფე დოსითეოსმა.