ბუნებრივ მოვლენებზე აქტიური ზემოქმედების ცენტრის ინფორმაციით, სეტყვასაშიშმა ღრუბლებმა ჩრდილო-დასავლეთის მიმართულებიდან კახეთში უკვე ჩამოყალიბებული 40-60 მმ-მდე დიამეტრის სეტყვის მარცვლები შემოიტანა. ცენტრის განმარტებით, 200 ერთეულამდე რაკეტა გაისროლეს და ღრუბლის მასები მნიშვნელოვნად შეამცირეს.
“ბუნებრივ მოვლენებზე აქტიური ზემოქმედების ცენტრმა მიმდინარე უპრეცედენტოდ მასშტაბური ატმოსფერული პროცესების შესამსუბუქებლად 200 ერთეულამდე რაკეტა გაისროლა და სისტემის საშუალებით ღრუბლის მასები მნიშვნელოვანწილად შეამცირა, მუშაობა ამ ეტაპზეც გარკვეული შეზღუდვების პირობებში მიმდინარეობს.
კერძოდ, ახმეტისა და თელავის რაიონებში სარაკეტო დამუშავება სროლისათვის აკრძალული ზონების არსებობის გამო დასახლებული პუნქტების გარეთ განხორციელდა.
საგარეჯოს რაიონში აკრძალულ ზონებს დაემატა ჰაერში საფრენი აპარატების არსებობის გამო არსებული შეზღუდვებიც, რის გამოც საერთო ჯამში მნიშვნელოვანი შეზღუდვებით ორას ერთეულამდე რაკეტა გავისროლეთ.
20:00 საათის მდგომარეობით ნალექის მასები სეტყვის სახით სამივე რაიონში უმეტესად დასახლებული პუნქტების თავზე, სროლისთვის აკრძალულ ზონებში ჩამოიცალა.
ასეთი დიდი მასშტაბის და მსგავსი ზომის სეტყვის მარცვლების შემცველი ფრონტალური ღრუბლის მასების შემოსვლა კახეთის რეგიონში, სეტყვის საწინააღმდეგო სისტემის არსებობის პირობებში პირველად დაფიქსირდა“, – ნათქვამია ცენტრის განცხადებაში.
თელავში დღეს, უხვი ნალექის გამო, საცხოვრებელი კორპუსის ეზოებიც დაიტბორა, სეტყვამ კი ახმეტის რაიონის რამდენიმე სოფელში სოფლის მეურნეობის სავარგულები დააზიანა.