შენ მათხოვარო აფერისტო, შენზე მაინც მაქვს საბუთები, თუ როგორ გაქვს მითვისებული თანხები, – ასე მიმართა ვახტანგ რჩეულიშვილმა ”ცენტრ პოინტის” ერთ-ერთ დაზარალებულ ბესიკ ბერიძეს ტელეკომპანია ”პალიტრანიუსის” გადაცემა ”360 გრადუსში”.
რჩეულიშვილის თქმით, მისი ქონების მისათვისებლად მიმდინარეობს მიზანმიმართული კამპანია, რომელიც კბილაშვილმა წამოიწყო. ”ცენტრ პოინტის” ერთ-ერთი დამფუძნებლის განცხადებითვე, დავაში ჩართული არიან სხვა კორპუსში მცხოვრები პირები, რომელთა წინაშეც კომპანიას პასუხისმგებლობა არ აქვს აღებული.
”დამთავრებულ ობიექტზე რომ მეტყვი ხუთასი ადამიანია დაზარალებული, რაზე უნდა ვილაპარაკო?! მედავებიან სხვა კორპუსის მცხოვრებლები. ყველაფერი ეს კბილაშვილის წამოწყებულია, რამაც შესაძლოა დაღუპვამდე მიიყვანოს ”ცენტრ პოინტი”, – აცხადებს ვახტანგ რჩეულიშვილი.
ვახტანგ რჩეულიშვილი პირდაპირ ეთერში ბესიკ ბერიძის გამოჩენამ გააღიზიანა, რომელიც კომპანიის დამფუძნებლებს, ვალდებულებების შეუსრულებლობასა და თანხების მითვისებაში ადანაშაულებს.
”შენ მათხოვარო აფერისტო, შენზე მაინც მაქვს საბუთები, თუ როგორ გაქვს მითვისებული თანხები. შენ და შენი ძმა ორივე მათხოვრები ხართ. თქვენ ჩვენი ქონების მისატაცებლად ხართ დაქირავებულები”, – მიმართა ვახტანგ რჩეულიშვილმა ბერიძეს.