ხაშურში, სოფელ ცედანის მიმდებარე ტერიტორიაზე იწვის ფოთლოვანი ტყის საფარი. წინასწარი მონაცემებით, დამწვარია 5 ჰა ფართობი. ამ წუთებში მიმდინარეობს ცეცხლის ლოკალიზება.
ადგილზე იმყოფება 100 მეხანძრე-მაშველი და 12 ერთეული სახანძრო-სამაშველო ტექნიკა. მათ შორის, ტყის სპეციალური სახანძრო მანქანები.
მობილიზებულია ყველა შესაბამისი სამსახური, რათა დროულად მოხდეს ხანძრის ლოკალიზება.
“10 სახანძრო მანქანა და 220 მეხანძრე-მაშველი მთელი ღამე ამ დრომდე ცდილობს ხანძრის ლოკალიზებას. თუმცა, ამას ქარი და ურთულესი რელიეფი აფერხებს. ამ დროისათვის დასახლებულ პუნქტამდე გავრცელების საფრთხე არაა,”- თქვა ალექსანდრე ხვადაგიანმა, სახანძრო-სამაშველო ძალების დეპარტამენტის დირექტორმა.
შინაგან საქმეთა სამინისტრომ გამოძიება დაიწყო სისხლის სამართლის კოდექსის 188-ე მუხლის მე-2 ნაწილით, რაც ცეცხლთან ან მომეტებული საფრთხის წყაროსთან გაუფრთხილებელი მოპყრობით
ნივთის დაზიანებას ან განადგურებას გულისხმობს.