თავდაცვის სამინისტრო მეორე მსოფლიო ომის ვეტერანებს გამარჯვების დღეს ულოცავს
ფაშიზმზე გამარჯვების დღესთან დაკავშირებით გენერალური შტაბის უფროსმა, გენერალ-მაიორმა ვახტანგ კაპანაძემ, საქართველოს თავდაცვის მინისტრის მოადგილეებმა დავით ებრალიძემ და ბესიკ ლოლაძემ ვაკის პარკში, უცნობი ჯარისკაცის საფლავი გვირგვინით შეამკეს და ომის ვეტერანებს გამარჯვების დღე მიულოცეს. მეორე მსოფლიო ომის ვეტერანებს გამარჯვების დღე საქართველოს თავდაცვის სამინისტროს გენერალური შტაბის წარმომადგენლებმაც მიულოცეს.
დღესვე, ფაშიზმზე გამარჯვების 71-ე წლისთავთან დაკავშირებული ღონისძიებები საქართველოს სხვადასხვა რეგიონებშიც გაიმართა. გენერალ-მაიორი ვახტანგ კაპანაძე და თავდაცვის მინისტრის მოადგილე ანა დოლიძე საქართველველოს უმაღლესი მთავარსარდალ, გიორგი მარგველაშვილთან ერთად გურჯაანშიც ჩავიდნენ. გენერალური შტაბის უფროსმა საბრძოლო დიდების მემორიალი – ჯარისკაცის მამის ობელისკი გვირგვინით შეამკო და ადგილობრივ ვეტერანებს გამარჯვების დღე მიულოცა.
„არასოდეს არ უნდა დაგვავიწყდეს ქართველების გაღებული სისხლი ფაშიზმთან ბრძოლაში. მთელი მსოფლიო ვალშია ქართველებთან, ვინაიდან ჩვენ გავეცით საუკეთესო, რაც კი შეგვეძლო ამ გამარჯვებისთვის. ვუსურვებ ყველა ვეტერანს დიდხანს სიცოცხლეს, წარმატებებს და ჯანმრთელობას“, – განაცხადა გენერალური შტაბის უფროსმა ვახტანგ კაპანაძემ.
დავით ებრალიძემ კი ცერემონიალის დასრულების შემდეგ აღნიშნა: „მინდა მივულოცო მთელ საქართველოს და ყველა ომის ვეტერანს ფაშიზმზე გამარჯვების დღე, უდიდესი დღე მე-20 საუკუნეში სადაც ყველაზე დიდი წვლილი გაიღო ქართველმა ხალხმა, დღე რომელიც ყველა ქართველს ახსოვს“.
