ლენტეხში მოსახლეობა ჰესების მშენებლობაზე და არსებულ საფრთხეზე საუბრობს. “ევროპული საქართველოს” პრეზიდენტობის კანდიდატი დავით ბაქრაძე ადგილობრივ მოსახლეობასთან ჩავიდა და მათ პრობლემებს გაეცნო. ინფორმაციას „ევროპული საქართველო“ ავრცელებს.
„ევროპული საქართველოს“ პრეზიდენტობის კანდიდატის განცხადებით, „ბევრ სხვა პრობლემასთან ერთად სვანეთში ძალიან მწვავედ დგას ჰესების პრობლემა და მოსახლეობას ძალიან აწუხებს ის შედეგები, რაც შეიძლება მოიტანოს ჰესების უკონტროლო მშენებლობამ“.
„ქვეყანას და ხალხს სჭირდება პრეზიდენტი, რომელიც იქნება ხალხთან ერთად, რომელიც იქნება ხალხის ხმა და რომელიც დაეხმარება ხალხს ყველა იმ პრობლემის მოგვარებაში, ყველა იმ მოსაზრების გათვალისწინებაში, რაც მათთვის მნიშვნელოვანია. ეს შეეხება ეკონომიკასაც, დასაქმებასაც, ეკოლოგიასაც, ძალიან ბევრ სხვა სფეროს, რადგან პრეზიდენტს შეიძლება რამე ფორმალურად არ ეხებოდეს კანონით, მაგრამ არ შეიძლება პრეზიდენტს არ ეხებოდეს პრობლემები და გაჭირვება, რომელიც მის ხალხს აწუხებს ქვეყანაში“, – განაცხადა დავით ბაქრაძემ.
საქართველოში საპრეზიდენტო არჩევნები 28 ოქტომბერს გაიმართება.