კობა დავითაშვილი – ამ საქმის საბოლოო შედეგი იქნება მაშინ, როდესაც გამოძიება მიხეილ სააკაშვილამდე მივა და დაიჭერს

პარლამენტის დეპუტატი კობა დავითაშვილი პროკურატურის მიერ 2007 წელს მისი ცემის ფაქტის გახსნას ეხმაურება.

„მივესალმები პროკურატურის მიერ ჩატარებულ გამოძიებას და დღევანდელ განცხადებას. ამასთანავე, აღვნიშნავ, რომ თუ პროკურატურა ზურაბ ადეიშვილთან საპროცესო გარიგებას გააფორმებს და იგი გამოძიებასთან ითანამშრომლებს, წინააღმდეგი არ ვიქნები. თუმცა, ამ საქმის საბოლოო შედეგი იქნება მაშინ, როდესაც გამოძიება მიხეილ სააკაშვილამდე მივა და დაიჭერს. არ ვიცი, შეძლებს თუ არა ხელისუფლება ამას, მაგრამ საბოლოო შედეგი მიხეილ სააკაშვილის დაკავებაა“, – აცხადებს „კვირასთან“ საუბრისას კობა დავითაშვილი.
კითხვაზე, ითხოვს თუ არა მიხეილ სააკაშვილის დაპატიმრებას, მიუხედავად იმისა, რომ მასთან ნათელმირონობა აკავშირებს, კობა დავითაშვილი დასძენს:
„მიუხედავად იმისა, რომ მიხეილ სააკაშვილი ჩემი შვილის ნათლიაა, ამას არასდროს შეუშლია ხელი მისთვის ჩემი მკვლელობის მცდელობისთვის და მე რატომ არ უნდა მოვითხოვო, მისი დაპატიმრება?“.
საქართველოს მთავარი პროკურატურის სამართალწარმოების პროცესში ჩადენილი დანაშაულის გამოძიების დეპარტამენტმა 2007 წლის 07 ნოემბრის საპროტესტო აქციის დროს, კობა დავითაშვილის ცემისა და მისი თავისუფლების უკანონო აღკვეთის ფაქტი გახსნა.