Euronews-ზე აჭარაში ჩატარებული მსოფლიო საჭადრაკო ოლიმპიადის შესახებ გადაცემა მომზადდა. გადაცემა „Focus“-ის გადამღები ჯგუფი ბათუმში მსოფლიო საჭადრაკო ოლიმპიადის გასაშუქებლად ჩავიდა. ინფორმაციას აჭარის მთავრობა ავრცელებს.
რეგიონის ტურისტული პოტენციალისა და ოლიმპიადის მნიშვნელობის შესახებ, „ევრონიუსის” სპეციალური რეპორტაჟისთვის ინტერვიუ აჭარის ავტონომიური რესპუბლიკის მთავრობის თავმჯდომარემ თორნიკე რიჟვაძემ მისცა.
აჭარის მთავრობის თავმჯდომარე Euronews-ის გადამღებ ჯგუფს ასევე ესაუბრა რეგიონის ტურისტულ პოტენციალზე და აღნიშნა, რომ საქართველო და მისი ულამაზესი კუთხე აჭარა უნიკალური ტურისტული დანიშნულების ადგილებია, რომელთაც უძველესი კულტურა, მრავალფეროვანი სამზარეულო და პერსპექტივები გააჩნია.
Euronews-ის წარმომადგენლებმა ბათუმში ყოფნისას ასევე გადაიღეს ქალაქის ღირსშესანიშნაობები და ძველი და ახალი თაობის ქართველ მოჭადრაკეებსაც გაესაუბრნენ.
ბათუმში 43-ე მსოფლიო საჭადრაკო ოლიმპიადა 23 სექტემბერს გაიხსნა და 5 ოქტომბერს დასრულდა. მასში 180 ქვეყნის 4000-მდე მოჭადრაკე მონაწილეობდა.