ასეთი ფორუმი უშუალოდ ჩვენთვის საუკეთესო შესაძლებლობაა ვესაუბროთ ჩვენს პარტნიორებს ქვეყანაში თავდაცვისა და უსაფრთხოების კუთხით მიღწეულ მნიშვნელოვან პროგრესზე, რაც საქართველოს კიდევ უფრო მეტად აახლოებს ნატო-სთან და ევროკავშირთან, – ამის შესახებ საქართველოს პრემიერ-მინისტრმა მამუკა ბახტაძემ საქართველოს თავდაცვისა და უსაფრთხოების რიგით მე-12 კონფერენციის გახსნაზე სიტყვით გამოსვლისას განაცხადა.
მამუკა ბახტაძემ კონფერენციის მნიშვნელობაზე ისაუბრა და იმედი გამოთქვა, რომ 2 დღის განმავლობაში მოხდება ისეთი აქტუალური თემების განხილვა რაც ცივილიზებული სამყაროსთვის მნიშვნელოვანია.
„მადლობა მინდა გადაგიხადოთ ჩვენს კოლეგებს და მეგობრებს ჩვენი ქვეყნის მხარდაჭერისთვის. თქვენი მტკიცე პოზიცია საქართველოს მიმართ გადამწყვეტია საქართველოს დემოკრატიული განვითარებისა და აღმშენებლობის გზაზე. მიგვაჩნია, რომ საქართველოს თავდაცვისა და უსაფრთხოების კონფერენცია უნიკალური რეგიონალური ფორუმია, რომელიც ბოლო 12 წლის განმავლობაში თავს უყრის მაღალი რანგის სტუმრებს მსოფლიოს ბევრი ქვეყნიდან. განსაკუთრებით მნიშვნელოვანია ჩვენთვის, რომ კონფერენციაში მონაწილეობენ მაღალი რანგის ოფიციალური პირები, თავდაცვისა და უსაფრთხოების სფეროს ექსპერტები, ასევე სამოქალაქო საზოგადოება, მედიისა და აკადემიური წრეეების წარმომადგენლები, რაც უფრო მრავალმხრივს და საინტერესოს ხდის ფორუმს. დღევანდელ კონფერენციაზე განსახილველი საკითხები, ვფიქრობ, ძალიან აქტუალურია, რადგან ეხმიანება ბოლო დროს მსოფლიოში მიმდინარე მოვლენებს. ევროატლანტიკური უსაფრთხოების, თავდაცვისა და რეგიონალური სტაბილურობის წინაშე მდგარი გამოწვევები იქნება განხილვის მთავარი საგანი. ამავე დროს დარწმუნებული ვარ, სამომავლო პროგნზებსაც გავაკეთებთ და დავსახავთ გამოწვევის გადასალახ გზებსაც. გარდა ამისა, ასეთი ფორუმი უშუალოდ ჩვენთვის საუკეთესო შესაძლებლობაა ვესაუბროთ ჩვენს პარტნიორებს ქვეყანაში თავდაცვისა და უსაფრთხოების კუთხით მიღწეულ მნიშვნელოვან პროგრესზე, რაც საქართველოს კიდევ უფრო მეტად აახლოებს ნატო-სთან და ევროკავშირთან“, -განაცხადა მამუკა ბახტაძემ.