ძალა, რომელიც რევანშისთვის ემზადება, საფრთხეა ქვეყნისთვის, რადგან რევანშისთვის ემზადება, უმძიმეს დანაშაულში ბრალდებული პირების შეწყალებისთვის ემზადება, – ამის შესახებ უმრავლესობის დეპუტატმა, ეკა ბესელიამ განაცხადა.
“დღეს არჩევანია: სააკაშვილი და მისი ჯგუფი, რომლის დიდი ნაწილი უმძიმეს დანაშაულებშია მხილებული და მეორე მხარეს არის კანდიდატი სალომე ზურაბიშვილი, რომლის მთელი წარსული ევროპული გამოცდილებაა. არის არჩევანი, რომელიც ქვეყნისთვის სიმშვიდის და ხვალინდელი განვითარების ერთ-ერთი მნიშვნელოვანი გარანტია, როგორც საპრეზიდენტო პოსტი. ეს არჩევნები სახიფათო იმიტომაც არის, რომ ძალა, რომელიც რევანშისთვის ემზადება, საფრთხეა ქვეყნისთვის, რადგან რევანშისთვის ემზადება, უმძიმეს დანაშაულში ბრალდებული პირების შეწყალებისთვის ემზადება. ეს შესაძლოა, ისე ქაოტურად განხორციელდეს და პერსონალური შურისძიების პროვოცირებაც მოხდეს. უნდა გავაცნობიეროთ, ეს სადამდე მიგვიყვანს. იქ დაბრუნება აღარ შეიძლება“, – განაცხადა ეკა ბესელიამ.
ამასთან, მისი თქმით, კრიტიკა ობიექტურია და ბევრი რამ შესაცვლელია.
„ჩვენ ამ ცვლილებების განხორციელების აუცილებლობას ვხედავთ. ახლა ყველამ უნდა გავაცნობიეროთ, რომ ყველას ერთი მიზანი აქვს, ქვეყანამ წინ გადადგას ნაბიჯი და წარსულში არ ჩაიძიროს. სხვა ყველაფრის დრო დგება და ყველაფერს თავის სახელი დაერქმევა“, – განაცხადა ეკა ბესელიამ.