“ქართული ოცნების” ცენტრალურ ოფისში მაჟორიტარ დეპუტატებთან შეხვედრები იმართება

“დღეს არის რეგიონული შეხვედრები. მე, როგორც კასპის მაჟორიტარი, ვესწრები შიდა ქართლის რეგიონის შეხვედრას. გვექნება შემდეგი ნაბიჯებისა და სტრატეგიის განხილვა”, – ამის შესახებ საპარლამენტო უმრავლესობის წარმომადგენელმა, ირაკლი მეზურნიშვილმა განაცხადა. მისივე თქმით, საზოგადოების გზავნილი მიღებულია, რაზეც მმართველი გუნდი აქტიურად იმუშავებს.
„ვაგრძელებთ იმ სტრატეგიასა და ტაქტიკაზე მუშაობას, რომელიც საპრეზიდენტო არჩევნების მეორე ტურის წინ დავისახეთ. ძალიან დიდი სამუშაოა ჩასატარებელი, სრული მობილიზებაა საჭირო. მივიღეთ გზავნილი ჩვენი საზოგადოებისგან, ნათლად ვაცნობიერებთ, რომ არის დაშვებული შეცდომები და ისინი გამოსასწორებელია. ამაზე ძალიან აქტიურად ვიმუშავებთ. ჩვენი საზოგადოების უდიდესი ნაწილი მიხვდება, რომ ეს პროცესი ამ დღეებში დაიწყება.
დარწმუნებული ვარ, მეორე ტურში არა მარტო გავიმარჯვებთ, არამედ დამაჯერებლად გავიმარჯვებთ და შემდეგი ორი წელი, ვიდრე დადგება საპარლამენტო არჩევნები, აბსოლუტურად სხვა შედეგს დავდებთ, რაც პირდაპირ მოუტანს კეთილდღეობას საზოგადოებას”, – განაცხადა ირაკლი მეზურნიშვილმა.