ქართული საზოგადოებისგან მივიღეთ გზავნილი და ეს გზავნილი არის გააზრებული, – ამის შესახებ პრემიერ-მინისტრმა მამუკა ბახტაძემ დღეს გამართულ პრესკონფერენციაზე განაცხადა.
მისი თქმით, მნიშვნელოვანია კონკრეტული სიკეთეების საზოგადოებამდე მიტანა.
„რაც შეეხება გამოწვევებს, ამაზეც მინდა შეგახსენოთ, რომ დაწყებული გვქონდა და ვაგრძელებთ ჩვენი რეგიონული მართვის სისტემის რეფორმირებას. ჩვენ გვაქვს ამ სისტემაში ძალიან მნიშვნელოვანი და ხელშესახები არაეფექტურობა, რომელიც აფერხებს იმას, რომ ჩვენ რაც შეიძლება მოკლე ვადაში მივიტანოთ ის კონკრეტული სიკეთე, რომელსაც ესა თუ ის ინიციატივა გულისხმობს. თქვენ თუ შეხედავთ სტატისტიკას და გამოყოფილ ბიუჯეტს, სოციალური პოლიტიკის თვალსაზრისით, ინფრასტრუქტურის განვითარების თვალსაზრისით, ადგილობრივ დონეზე და ასევე ცენტრალური სისტემის დონეზე, ძალიან მნიშვნელოვანი პროგრესია და ძალიან მნიშვნელოვანი თანხებია ამ ყველაფრისთვის გამოყოფილი. მთავარია ეფექტურობა და ის, რომ ეს კონკრეტული სიკეთეები ჩვენ რაც შეიძლება დროულად მივიტანოთ ჩვენს მოქალაქეებამდე. რაც შეეხება ცვლილებებს, ბუნებრივია, ცვლილებები ისედაც გვქონდა გათვალისწინებული და ამ გზავნილმა კიდევ უფრო დაადასტურა, რომ ჩვენ ამ მიმართულებით გვჭირდება ძალიან ნიშვნელოვანი ცვლილებები“, – განაცხადა ბახტაძემ.