“პარტიის ლიდერი პასუხისმგებლობას იღებს და ეს პასუხისმგებლობა მხოლოდ ერთ ადამიანზე არ უნდა იყოს”

“ბიძინა ივანიშვილის მიმართვა არის ლიდერის განცხადება, რომელმაც თავისუფლებისა და იმ ბრძოლის ფასი იცის, რაც 2012 წლის გამარჯვებამ მოიტანა”, – ასე შეაფასა საქართველოს პარლამენტის იურიდიულ საკითხთა კომიტეტის თავმჯდომარემ, ეკა ბესელიამ, „ქართული ოცნების“ თავმჯდომარის ბიძინა ივანიშვილის დღევანდელი ვიდეომიმართვა.
ბესელიას განცხადებით, საჭიროა ხალხთან გაერთიანება, რათა დაძლეული იყოს საფრთხე, ის საშიშიროება რაც ქვეყნის წინაშეა.
„მიმართვის ყველა პუნქტი ძალიან საყურადღებოა, სათქმელი ძალიან ღიად და გულწრფელად არის წარმოჩენილი. რეალობის ძალიან გულწრფელი, ობიექტური ანალიზია და იმ პრობლემების დანახვა ხდება, რაც ხელისუფების მიერ გადასაწყვეტია. ყველაზე მნიშვნელოვან მოცემულობაზე პასუხისმგებლობის განცდა და ყველაფრის გააზრებაა. ახლა ეტაპი დგას, როცა მმართველი პარტია არსებულ პრობლემებს ხედავს. ხალხს პირდაპირ ვეუბნებით, რომ არჩევნებით სასწორზე ის მონაპოვარი დგას, რაც ხანგრძლივი ბრძოლის შედეგად 2012 წლის გამარჯვებამ მოიტანა. ეს მონაპოვარია – თავისუფლება, ადამიანის უფლებები, ქვეყნის გამთლიანების პროცესის დაწყება, ადამიანის პატივისცემა და სიცოცხლის უფლების დაცვა. რაც დიდი ბრძოლის შედეგად 2012 წელს იყო მოტანილი, სასწორის ერთ მხარეს დევს და მეორე მხარეს არის არა პოლიტიკური ძალა, არამედ სამწუხაროდ, რევანშისთვის მომართული გაერთიანება, რომელიც საფრთხეს იმ ყველაფერს შეუქმნის, რაც 2012 წელმა მოიტანა. პარტიის ლიდერი პასუხისმგებლობას იღებს და ეს პასუხისმგებლობა მხოლოდ ერთ ადამიანზე არ უნდა იყოს, ის ყველამ ჩვენს სფეროსა და არეალში უნდა გადავინაწილოთ. ახლა საჭირო იმ მონაპოვარის დაცვაა, რასაც თავისუფლება, ადამიანის სიცოცხლისა და მისი ძირითადი უფლების გადარჩენა ჰქვია”,- აღნიშნა დეპუტატმა.
ეკა ბესელია მიიჩნევს, საუბარი არ არის იმაზე, რომ ვინმე ხელისუფლებას დაკარგავს, არამედ საუბარია იმაზე, რომ ქვეყანაში მთავარ ღირებულებებს საფრთხე დაემუქრება.
“ხალხთან ერთად გაერთიანება გვჭირდება, რათა ეს საფრთხე დავძლიოთ, საშიშროება რაც ქვეყანას უდგას, გადაილახოს და ცვლილებების განხორციელება მყისიერად დაიწყოს. ხელისუფლებამ არჩევნებით ის პრობლემები დაინახა, რაც მოქალაქეებს აწუხებთ. პრობლემების გადაწყვეტას გაბედული ნაბიჯი და სიახლეები სჭირდება. ეს შემდგომი ეტაპია, რაც არჩევნების დასრულებას მოჰყვება. ქვეყნისთვის ძალიან საპასუხისმგებლო ეტაპია, სასწორზე დევს ყველაფერი, რისთვისაც 2012 წლამდე და მანამდე ვიბრძოდით. რევანშისტული ძალისგან საფრთხე ადამიანისა და სიცოცხლის უფლებას ემუქრება”, – განაცხადა ეკა ბესელიამ ჟურნალისტებთან საუბრისას.